Mayıs 9-da Aqmescit rayonınıñ Çoyunçı (Urojaynoye) köyünde yerli sakinler Ekinci cian cenki yıllarında elâk olğanlarnı añdı ve qırımtatar uçucısı Amethan Sultannıñ büstüne çiçekler qoydılar. Bunı qırımtatar milliy areketiniñ faaliyetçisi Nariman Celâl özüniñ Facebooktaki saifesinde bildirdi.
Celâl: «Bugün Aqmescit rayonınıñ Çoyunçı köyünde balalar ve büyükler bu cenkte elâk olğanlarnı ve Amethan Sultannı ürmet ile añdılar. Diqqatqa lâyıq olğan şu ki, bütün mektep yerli Ulu Vatan cenki qaramanlarınıñ eykeline kelip, eki defa Sovet Birligi Qaramanınıñ büstüne yalıñız qırımtatar balaları keldi», – dep yazdı.
Qırımtatar halqınıñ erbabı, eki defa Sovet Birligi Qaramanı, uçucı Amethan Sultan 1920 senesi oktâbr 20-de Alupkada doğdı. Babası – lak (Dağıstandaki Tsovkra-1 avulından asıl oldı), anası – qırımtatar. Ana-babasına köre Amethannı em Dağıstanda, em qırımtatarlar öz qaramanı sayalar. Amethan 603 arbiy uçuş yaptı, şahsen 30 ve gruppa ile 19 lüftvvaffe (natsist Almaniyanıñ ava quvetleri) uçağını urıp tüşürdi. Uçucı olıp çalışqan vaqtında 100 qadar uçaqnı menimsedi, umumiy uçuş tecribesi 4237 saatnı teşkil etti.
Amethan Sultan, Tu-16 uçucı laboratoriyasında sınama uçuş yapqanda elâk oldı. Moskvada Novodeviçye mezarlığında defin etildi. Onıñ adı Dağıstannıñ paytahtı – Mahaçkala halqara ava limanına berildi.
Rusiye tarafından ilhaq etilgen Qırımda mayıs 9-da sovet bayramı olğan Ğalebe künü qayd etile. Bu kün Qızıl ordu ve sovet halqınıñ natsist Almaniyası üzerinde ğalebe bayramı sayıla.
Aqmescit, Aqyar ve Keriçte arbiy paradlar keçti.
