Qırımtatar Milliy Meclisiniñ reisi Refat Çubarov, qırımtatarlarnı ilhaq etilgen Qırımda mayıs 18-de, Qırımtatar halqınıñ Qırımdan sürgün etilmesi qurbanlarını hatırlama kününde umum Ukraina sükünet daqqasına qoşulmağa davet etti. Bunı Çubarov mayıs 5 künü aqşam özüniñ Facebooktaki videoblogında söyledi.
Çubarov: «(Mayıs 18 – QA) saat 12-de Ukrainanıñ bütün qıtadaki qısmında sükünet daqqası keçecek. Bu, közge çarpsın, er bir Rusiye işğalcisi ve olarğa qatılğanlar, qırımtatarlarnıñ mutlaq ekseriyeti Rusiye işğaline boysunmağanını körsünler, dep, bir şeyler tüşünip tapmağa tırışıñız», – dedi.
Qırımtatar Milliy Meclisiniñ başlığı, Ukrainanıñ türlü şeerlerinde Qırımtatar halqınıñ Qırımdan sürgün etilmesi qurbanlarını hatırlama kününe bağışlanğan bir sıra tedbirler keçecek, dep qayd etti.
«Mayıs 18-de prezident, parlament ve Nazirler kabineti ile birlikte bir sıra tedbirler keçirmek isteymiz. Bu yıl o tedbirlerniñ ötkerilmesi formatını deñişterecekmiz. Bu, o künü qırımtatar halqınen beraber olmaq istegenlerge qoşulmağa imkân berecek», – dedi o.
Çubarovnıñ bildirgenine köre, ayrıca, qırımtatar halqınıñ sürgün etilmesi qurbanlarını hatırlama matem tedbirleri Herson vilâyeti, Geniçesk rayonı, Novoalekseyevka, Odesa, Lviv ve tedbirler ukrain ve yeudi cemaatlarınıñ iştiraki ile Holokost muzeyinde ötkerilecek Dneprde keçecekler.
Qırımdan qırımtatar halqınıñ sürgün etilmesi qurbanlarını hatırlama künü er yıl mayıs 18-de qayd etile. Bu künde qırımtatarlar tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
