Aqmescitte Rusiye TİNiniñ Qırım boyunca idaresinde iş adamı Resul Velilâyevniñ qız qardaşı Zera Velilâyevanı sorğulaylar. Bunı Qırım.Aqiqat muhbiri bildire.
Velilâyevanıñ qız qardaşı Rebiyeniñ malümatına köre, sorğu, polis idaresine kelip yetiştirmegen advokatı yanında olmadan, bir saat qadar devam ete.
Zera Velilâyeva «KrımOpt» şirketinde muhasebeci olaraq çalışa.
Qırımtatar milliy areketiniñ faaliyetçisi Ali Bariyevni de Aqmescitke alıp kettiler. Ondan telefon ve planşetni musadere ettiler. Aqrabalarınıñ aytqanına köre, al-azırda Bariyvde advokat yoq.
Resul ve Ekrem Velilâyevlerniñ evlerinde tahqiqat tedbirleri devam ete.
Qırım.Aqiqat muhbiriniñ malümatına köre, tintüvler Rusiye Cinaiy kodeksiniñ 238-nci maddesiniñ 2-nci qısmı (telükesizlik talaplarına uymağan mallar ve mahsulatnıñ istisalı, saqlanması ya da satılması, ve bunıñ kibi de işlerniñ yapılması ve hizmetlerniñ kösterilmesi beş yıllıq muddetke qadar mecburiy işler ya da on yıllıq muddetke qadar azatlıqtan marum etüv ile cezalana) boyunca açılğan işniñ çerçivesinde keçirile edi.
Aprel 26 sabasında Qarasuvbazarda «Güzel» ticaret ağı ve «KrımOpt» şirketinniñ tükânlarında Rusiye telükesizlik hadimleri tarafından tintüvler yapılğanı belli oldı.
Qırımtatar Milliy Meclisiniñ reisi Refat Çubarov Rusiye telükesizlik hadirmleriniñ qırımtatar iş adamları, hayratçılar ve qırımtatar milliy areketiniñ iştirakçileri Ali Bariyev, Asan Bariyev, Remzi Velilâyev, Resül Velilâyev, Ekrem Velilâyev, Zera Velilâyeva ve olardan ayrı yaşağan yetişken balalarınıñ evlerine tintüvler ile kelgenini bildirdi.
Al-azırda Rusiye telükesizlik hadimleri ve Kremlniñ kontroli altında olğan Qırım ukümeti tarafından bu vaziyetke dair berilgen izaatlar yoq. Tafsilâtlar ögrenile.
«Güzel» ticaret ağı ve «KrımOpt» şirketi iri bir iş adamı ve hayratçı Resül Velilâyevge ait.
Qırım Rusiye tarafından ilhaq etilgen soñ mustaqil jurnalistler, vatandaş faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqaları bar dep şübhe altında tutulğan Qırım musulmanlarınıñ evleri ketken sayın daa sıq olaraq kütleviy surette tintilmekteler.
