Ukraina, BMTniñ Halqara mahkemesine, Rusiyeniñ, 2017 senesinde qabul etilgen Rusiyege qarşı muvaqqat çareler körüv emirine binaen, Qırımtatar Milliy Meclisiniñ yasağını lâğu etmek kerek olğanını tasdiqlamaq ricasınen muracaat etti. Ukraina TİNi, munasip muracaat aprel 24-te yollanılğan edi, dep bildire.
Ukraina, emirniñ imzalanmasından bir yıl keçken soñ Rusiye Qırımtatar Milliy Meclisiniñ faaliyetini yasaq etmege devam ete ve oña ayaq çala, dep qayd ete.
Bildirüvde: «Rusiyeniñ, BMTniñ Halqara mahkemesiniñ emiri ile doğrudan qararlaştırılğanına uyğun olaraq, Meclis faaliyetiniñ diskriminatsion yasağını lâğu etmek istemegeni artıq bellidir. Ukraina, böyle yanaşuvğa qatiyen qarşı çıqa; emirniñ metni soñ derecede açıq, añlayışlı ve o, yasaqnıñ deral lâğu etilmesini talap ete», – denile.
Ondan ğayrı Ukraina Tış işleri nazirliginde, Halqara mahkemeniñ emri Rusiyeniñ Qırım sakinlerine ukrain tilinde tasilniñ alınmasına irişüvni temin etmek mecbur olğanını tayin ete, ve taraflarnı, em Qırım Muhtar Cumhuriyetiniñ territoriyasında diskriminatsion areketlerni yapuv, em de Ukrainanıñ şarqında terrorizm aktlarına qol tutuv kibi mahkemedeki davanı keskinleştire bilecek çarelerni körmemege davet ete, dep hatırlattılar.
Ukraina Rusiyeniñ Halqara mahkeme tarafından qabul etilgen muvaqqat çarelerniñ tatbiq etilmesi boyunca qararnıñ izalanmasına yanaşuvından dolayı nevbetteki kere teren endişesini ifade etti ve, Rusiyeniñ areketleri halqara uquqnıñ normalarına uymaylar, dep bildirdi.
2017 senesinde Ukraina BMTniñ Halqara mahkemesinde Rusiyege qarşı, Ukrainada terrorizm aktlarına para ayırğanı ve qol tutqanı, em de Ukrainağa qarşı tecavuz aktlarınıñ yapılması çerçivesnde ırqiy diskriminatsiya aktlarında iştirak etkeni içün mesüliyetke çekmek maqsadınen dava açtı.
Ondan ğayrı Ukraina, vaziyetniñ acele areketler talap etkenini köz ögünde tutıp, BMTniñ Halqara mahkemesine, munasip muvaqqat çarelerni qabul etmek ricası ile muracaat yolladı. 2017 senesi aprel 19-da mahkeme, Ukrainanıñ talabına cevaben, Rusiyege qarşı muvaqqat çarelerni körmek qararını aldı.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
