Qırımtatar Milliy Meclisiniñ reisi Refat Çubarov, ilhaq etilgen Qırımda Rusiye ukümeti UNESCOnıñ missiyasınıñ ihtimallı kelmesine er türlü usullarnen qarşı çıqacaq, dep saya.
Bunı o, aprel 18-de Yuqarı Radada keçken «Ukrainada medeniy mirasnı qorçalavnıñ problemaları ve perspektivaları» parlament diñlemeleri esnasında söyledi.
Çubarov, Rusiyeniñ UNESCO missiyasına ihtimal ile qarşı çıqacağı munasebeti ile parlament diñlemeleriniñ neticeleri boyunca olarnıñ tevsiyelerine «Qırımda qırımtatar abidelerini mahv etken Rusiye işğalcileri ve bunı bivasta olaraq icra etkenlerni taqip etüv ve mesüliyetke çeküv qısmında milliy qanunlar ve halqara teşkilâtlarnıñ imkânlarını kenişletmekni» közde tutqan maddelerni kirsetmek teklif etti.
1Aprel 11-de Ukraina tış işleri naziri Pavlo Klimkin, UNESCO icra komiteti tarafından Qırımda közetüv missiyasınıñ çalışması imkânlı olğanı aqqında qarar alınğanını bildirdi. TİN başlığınıñ firkrine köre, halqara teşkilât vekilleriniñ ziyareti Qırımda medeniyet abideleriniñ saqlanmasına yardım etecek.
Bundan daa soñra Ukraina medeniyet naziriniñ birinci muavini, Ukrainanıñ UNESCO işleri boyunca milliy komissiyası yanındaki medeniyet ve medeniy miras bölüginiñ rehberi Svetlana Fomenko, ilhaq etilgen Qırımğa UNESCO missiyasını yollamaqtan evel Kyiv, onıñ yapacaq işleriniñ mehanizmlerini uzlaştırmaq kerek, degen edi.
UNESCOnıñ qararında cümleden, BMTniñ Ukrainada insan aqlarınıñ kütülmesini közetüv boyunca missiyasınıñ Qırımğa endi üç yıldan berli kirip olamağanı qayd etile. Daa evel yarımadağa halqara közeticilerni yibermege azır olğanını Kremlniñ kontroli altında olğan Qırım başlığı Sergey Aksönov bildirgen edi.
Ukraina Medeniyet nazirligi, Rusiyeniñ ilhaq etilgen Qırım territoriyasında yapqan areketleri yarımadanıñ topraqlarındaki Ukrainanıñ medeniy mirasına zarar ketire, dep iddia ete. Bu areketler, Ukrainanıñ «Medeniy mirasnıñ muafaza etilmesi» qanunını ve, ondan ğayrı, UNOSCOnıñ 1972 senesi Konventsiyasını bozalar.
