Ukraina Tasil ve ilim nazirligi, Donbassnıñ vaqtınca işğal etilgen territoriyaları ve ilhaq etilgen Qırımda berilgen diplomlar ve diger tasil vesiqalarınıñ Ukrainada ve dünyanıñ diger ülkelerinde tanılmağanlarını ve uquqiy quvetke malik olmağanlarını hatırlata. Bu hususta muessiseniñ saytındaki nazirlik tarafından bildirilgen tafsilâtlarda aytıla.
Tasil ve ilim nazirliginde, 2014 senesinde Donetsk ve Luhansk vilâyetlerindeki aliy oquv yurtlarında oqumağa başlağan ve soñundan Rusiye tarafından qol tutuv körgen uruşmacılarnıñ kontroli altına tüşken studentler tasillerini Ukrainanıñ er bir aliy oquv yurtunda devam etmek mumkünler, dep qayd eteler.
2014 senesi fevral 20-den soñ ilhaq etilgen Qırımnıñ territoriyasında aliy malümat sistemasında oquğan studentler ise elde etken ihtisaslarınıñ tasdiqlanması içün Ukraina aliy oquv yurtlarında attestatsiya keçmek mumkünler.
Ondan ğayrı, nazirlikte, Ukrainanıñ kontroli altında olmağan Donbass ve Qırımdan kelip, Ukraina tasilini almaq istegenler köçürilgen ya da mahsus vekâletler berilgen aliy oquv yurtlarına sadeleştirilgen tarzda kirmek mumkünler, dep qayd ettiler. Bu maqsatnen böyle aliy oquv yurtlarınıñ bazasında tasil merkezleri faaliyet kösterecek. 2018 senesinde olarnıñ çalışması iyün 19-dan sentâbr 30-ğa qadar devam etecek, dep planlaştırıla.
Donbasstaki silâlı çatışma, 2014 senesinde Qırım Rusiye tarafından ilhaq etilgen soñ başlap, ale daa devam ete. Ukraina ve Ğarp Rusiyeni separatistlerge silâlı şekilde qol tutqanında qabaatlaylar. Kreml bu qabaatlavlarnı inkâr ete, ve Donbassta yalıñız Rusiyeden kelgen «göñülliler» bulunmaq mumkünler, dey. BMTniñ malümatına köre, çatışma esnasında 10 000-den ziyade kişi elâk oldı.
Ukraina İçtimaiy siyaset nazirliginiñ malümatına köre, aprel 2-deki vaziyetke binaen Ukrainada Donbass ve Qırımdan mecburen köçken 1492590 kişi qayd etildi.
