Yaltalı «Hizb ut-Tahrir işi» boyunca tevqif etilgen Emir-Usein Kukunıñ ömür arqadaşı martnıñ 27-nde Rostov na-Donu şeeri SİZOsında oturğan qocasından birinci mektüpni alğan. Uquimayecisi ailesine muracaat eterek, sualler bere, öz vaziyeti aqqında pek az şey yaza, dep ikâye etti Qırım.Aqiqatqa Meryem Kuku.
«О, bizler, balalar ve olarnıñ oquvı aqqında soray. Oğlunı qasevet ete, çünki şimdi o tamam ösmürlik çağında. Ozü aqqında ise, er şey bir yoruq dep yaza. Şimdi №4-nci SİZOda eken, o yerniñ şartları fena degil emiş: yarıq, temiz, üceyresi quru eken», – dep ikâye ete qadını.
2016 senesi fevral-mart ayları arasında Yaltada Arsen Cepparov ve Refat Alimov, Emir-Üsein Kuku, Muslim Aliyev, Enver Bekirov ve Vadim Sirük tutulıp alınğan edi. Olar Rusiyede yasaqlanğan «Hizb ut-Tahrir» islâm siyasiy teşkilâtına alâqası olğanındsa qabaatlanğan edi.
Daa evel Rusiye arbiy mahkemesi Yaltalı «Hizb ut-Tahrir işi» mahkemelerini Aqmescitte köçme oturışuvda keçire edi. Ondan soñ tevqif etilgen qırımlılar Rostov-na-Donu şeerine yollanıldı.
Martnıñ 28-nde soñki oturışuv esnasında Aqmescit Arbiy garnizon mahkemesinde Yaltalı «Hizb ut-Tahrir işi» boyunca qabaatlağan tarafnıñ şaatı Aleksandr Aslanovnı sorğulanğan soñ, mahkeme oturışuvını aprelniñ 12-ne avustırğan edi. Mahkeme oturışuvı qapalı tarzda keçkeni aqqında aytılmaqta. Adliyecilerden ğayrı mahkemege kimse kirsetilmegen.
Ukraina tış işleri nazirligi Rusiyeden Yaltalı «Hizb ut-Tahrir işi» altı iştirakçisiniñ azat etilmesi talap etken edi.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara aq-uquqqa binaen işğal etilgen topraqlarda işğalci devşetniñ qanunları kirsetilmesi yasaq.
