Moskvadaki aq-uquq qorçalayıcı teşkilâtları, Moskvada 2014 senesiniñ iyüninde ğayıp olğan Qırım sakini Eskender İbraimovnıñ izlerini tapmadılar.
Bunı Qırım.Aqiqat muhbiri bildire.
«Grajdanskoye sodeystviye» («Vatandaşlar qol tutuvı») komitetiniñ vekili Yelena Burtina: «Cevap aldıq… Polis tarafından yaqalanmadı, tedaviylev muessiselerine ketirilmedi. Bizge Kiyevskiy vokzalındaki polisniñ yolaq bölügine muracaat etmege tevsiye ettiler. Biz anda muracaat ettik, lâkin cevabı daa kelmedi», – dedi.
Moskvadaki «Merkeziy Asiyanıñ siyasiy muacirleri cemiyeti»niñ prezidenti Bahrom Hamroyev de İbraimovnıñ ğayıp oluvı munasebeti ile Moskva prokuraturasına malümat talabı ile muracaat etti.
Hamroyev: «Teşkerüv yapıla, degen cevap keldi. Bundan soñ yazışma toqtatıldı», – dep añlattı.
O, İbraimovnı mahsus hizmetler alıp qaçtı, ve şimdi o, «gizli apishaneler»den birisinde buluna, dep tahmin etti.
Aq-uquq qorçalayıcısı: «Umüt etemiz ki, o sağ. Lâkin nasıl alda bulunğanı… İhtimal ki, böyle apishanelerde bulunğanlar arasında kimse eziyetsiz qalmay», – dedi.
Aqmescit sakini Eskender İbraimov, yarımada Rusiye tarafından ilhaq etilgen soñ çoqqa barmadan apayınen beraber Qırımnı terk etti. Vinnitsa vilâyetinde yaşadı, soñ Vinnitsağa köçti. 2014 senesiniñ iyüninde İbraimov, iş ortağı ile körüşmek içün «Lviv-Moskva» treni ile Moskvağa ketti. Rusiye-Ukraina sıñırını keçken soñ onıñnen telefon bağı üzüldi, ve ondan soñ bulunğan yeri belli degil. İbraimovnıñ apayı ve anası, onıñ ğayıp olğanı aqqında arizalar ile Ukraina ve Rusiye uquqqoruyıcı organlarına muracaat etti.
