Martnıñ 23-nde Kreml nezareti altındaki Aqmescit Kiev rayon mahkemesinde qırımtatar faali Nariman Memedeminovke sıñırlav tedbiri tayin etilmesi maqsadınen mahkeme oturışuvı başlandı. «Qırım birdemligi» cemaat teşkilâtı haber etkenine köre, mahkeme binası ögünde oña qol tutmaq içün yerli sakinler toplanğan.
Emil Kurbedinov Nariman Memedeminovnıñ adliyecisi olaraq, Nariman Memedeminovnıñ tutulıp alınuvı ve evinde tintüv yapıluvı «Qırımdaki cemaat faalleri ve umumen vatandaş jurnalistikasına baştıtp taşlamaq» maqsadınen yapılğanını ve olıp keçkenler siyasiy taqip olğanı aqqında ayta.
Bir kün evel rusiyeli küç idaresinin hadimleri ve uquqqoruyıcılar Nariman Memedeminovnıñ evinde tintüv yapqan ediler. Tintüvden soñ onı Aqmescit FSB idaresine sorğulamaq içün alıp ketken ediler.
Teşkilât 2016 senesi fevralnn 11-nde Memedeminovnıñ evinde artıq tintüv yapılğan edi ve 2017 senesi iyülniñ 13-nde Bağçasaray rayon mahkemesi Memedeminovke qarşı memuriy iş açıp, 2017 senesi aprelniñ 13-nde Seydamet Mustafayevniñ evinde tüntüv yapılğan maalde, onıñ evi ögünde sanki dersiñ, qanunsız miting keçirdi dep qabaatlan edi. Tintüv maalinde semetdeşine qol tutmaq maqsadınen pek çoq qırımtatar kelgeninde, olarnıñ arasında Nariman da Memedeminov da bar edi.
Qırım ilhaqından soñ yarımadada rusiyeli akimiyet mustaqil jurnalistler, cemaat ve qırımtatar Milliy areketiniñ faalleri, Meclis azaları ve «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilmege başladı.
