Bir gruppa «közeticiler» ilhaq etilgen Qırımdaki qomşu Rusiye prezidenti saylavını közetmek içün Aqyarğa keldi.
Bunı Rusiyeniñ «RİA Krım» haber agentligi bildire.
Neşir: «İspaniya, İtaliya, Daniya, Ukraina, İsrail, İsveç ve Büyük Britaniya vekilleri Aqyar saylav komitetiniñ reisi Aleksey Petuhov, şeerden senator saylanğan Olga Timofeeva ve yerli Qanun çıqarıcı meclisniñ spikeri Aleksandr Kulagin ile körüştiler. Ecnebiylerni şeerde saylav ceryanı ve ayrıca Qara deñiz flotunıñ deñizcileri içün rey berüv şartları meraqlandırdı.
Rusiye kütleviy haber vastalarınıñ malümatına köre, Qara deñiz flotunıñ arbiy hadimleri 30-dan ziyade saylav noqtada rey berecekler.
İtaliya vekili Marko Marsili, ille Aqyarda saylavnı közetecegini söyledi.
«RİA Krım», ecnebiyniñ sözlerini naqil etip: «Men yarımadanı birinci kere ziyaret etem. Mında qorqmayıp keldim, çünki mında iç bir telüke olmağanını bile edim. Qırımda endi eki kün bulunam, ve mındaki vaziyetniñ tınç ve raat olğanını körem», – dep bildire.
Ukraina ukümeti tarafından açıq menbalarda ecnebiy vatandaşlarnıñ Qırım territoriyasına kelgenine dair berilgen izaat şimdilik yoq.
Daa evel Qırımğa Rusiye saylavını közetmek içün bir jurnalist ve Almaniyanıñ Kvakenbrük şeeri parlamentindeki Sol fırqa fraktsiyasınıñ başlığı Andreas Maurere keldiler.
Rusiye prezidenti saylavını 2018 senesi mart 18 – Qırımnıñ Rusiye tarafından ilhaqınıñ yıllığı kününde ötkermege planlaştıralar.
«Almaniya içün alternativa» fırqasınıñ parlamentarları Qırımnı fevral 3-te ziyaret ettiler. Ukrainanıñ Almaniyadaki elçisi Andrey Melnik, bazı Almaniya siyasetçileriniñ Qırımğa yapqan ziyaretlerine «mesuliyetsiz voyaj» dedi.
Almaniya ukümeti «Almaniya içün alternativa» fırqasına ait yerli siyasetçilerniñ ilhaq etilgen Qırımğa yapqan ziyaretlerini tenqit etti.
Rusiye ukümet organları, ecnebiy vatandaşlarnı Qırımğa davet etip, onıñ ilhaqını qanuniyleştirmek isteyler.
Ukraina Tış işleri nazirliginde, ecnebiy siyasetçilerniñ Qırımğa yapqan ziyaretlerinde resmiy statusı olmağanını bildireler. Keçken yılnıñ iyülinde Ukrainanıñ tış siyaseti muessisesi, muracaat neşir etip, onda ecnebiy vatandaşlar ve vatandaşlıqsız şahıslarnı Qırımğa qanunsız barmaqtan saqındırdı.
