Ukraina, BMT baş sekretari Antoniu Guterriş, Telükesizlik şurasınıñ başlığı Karel van Osterom ve bütün aza devletler eyetlerine, Rusiye tarafından ilhaq etilgen Qırımda prezident saylavınıñ ötkerilmesi BMT Nizamnamesini bozğanı aqqında resmiy mektüpler yolladı.
Bunı «Ukrinform» haber agentligi, Ukrainanıñ BMT yanındaki daimiy temsilcisi Volodımır Yelçenko tarafından imzalanğan munasip mektüplerniñ kopiyalarına atıf etip, bildire.
Vesiqada: «Ukrainanıñ vaqtınca işğal etilgen qısmı olğan Qırım Muhtar Cumhuriyeti ve Aqyar şeerinde qanunsız Rusiye prezidenti saylavınıñ teşkil etilmesi munasebeti ile dünya toplulığına, içindeki muracaatınen birlikte Ukraina Yuqarı Radasınıñ Qararını teslim etmege imkânım olğanından şeref duyam», – denile.
Mektüpte Ukraina TİNiniñ, Kremlniñ kontroli altında olğan Qırım ukümetiniñ yarımada territoriyasında rey berüvni teşkil etmek qararına dair beyanatı yer almaqta.
Mektüpte: «72-nci sessiyanıñ Kün tertibindeki 34-nci maddesiniñ (a) alt maddesine muvafıq olaraq bu mektüp ve onıñ ilâveleriniñ Baş assambleyasınıñ vesiqaları olaraq ve, ondan ğayrı BMT Telükesizlik şurasında darqatılmasına qol tutqanıñız içün teşekkürler bildirem», – denile.
Ondan ğayrı, muracaatta, Ukraina suverenitetiniñ bozulmasına ve bunıñ kibi de Qırımda insan aqlarınıñ bozulmasına ketire bilecek areketlerge yol bermemek kerekligi qayd etile.
Ukraina diplomatları, qanunsız rey berüvniñ ötkerilmesi taqdirde yarımadadaki Rusiye ukümet organlarınıñ vekillerine qarşı qoşumça sanktsiyalar tatbiq etmege davet eteler.
Ukraina Yuqarı Radasınıñ birinci vitse-spikeri İrına Heraşçenko mart 16-da ilhaq etilgen Qırımnıñ sakinlerine Rusiye prezidenti saylavını boykot etmek daveti ile muracaat etti.
Rusiye prezidentiniñ saylavı 2018 senesi mart 18 kününe – Qırımnıñ Rusiye tarafından ilhaqınıñ yıllığına tayın etildi. Onda sekiz namzet iştirak etecek – Sergey Baburin, Pavel Grudinin, Vladimir Jirinovskiy, Vladimir Putin, Kseniya Sobçak, Maksim Suraykin, Boris Titov ve Grigoriy Yavlinskiy.
Fevral 16-da Ukraina prezidenti Petro Poroşenko dünya toplulığını ilhaq etilgen Qırımda kelecekteki Rusiye prezidenti saylavınıñ neticelerini tanımamağa davet etti.
ABniñ tış işleri ve telükesizlik siyaseti boyunca Yüksek temsilcisi Federika Mogerininiñ beyannamesinde ilhaq etilgen Qırımda Rusiye prezidenti saylavınıñ tanılmaması aqqında denilmekte.
