Mart 13-te Rusiye tarafından ilhaq etilgen Qırımda Qara deñiz flotunıñ «Bastion» sail raketa kompleksiniñ atışları ötkerildi.
Rusiye haber agentlikleriniñ bildirgenine köre, «Bastion» raketa kompleksleri Qırımda «raqipniñ raketalarını şartlı olaraq mahv ettiler».
TASS, Rusiye Mudafaa nazirligindeki Cenübiy arbiy okrugı (CAO) matbuat hizmetiniñ rehberi Vadim Astafyevniñ sölerini naqil etip: «Bastion» sail raketa kompleksleriniñ taqımı, şartlı yüksek suratlı nişanlarnı muvafaqiyet ile tayin etti ve, elektron atışlar yapıp, «raqip»niñ qanatlı raketalarını şartlı olaraq urıp mahv etti», – dep bildire.
Talim CAO orduları komandanı Aleksandr Dvornikovnıñ kontroli altında ötkerildi, dep bildirile.
Rusiye Mudafaa nazirligi yanındaki matbuat hizmetiniñ bildirgenine köre, Dvornikov ziyaret esnasında «Qara deñiz flotu sail ordusınıñ birlikleri ve Qırımda yerleştirilgen CAO Arbiy ava quvetleri ile Ava mudafaası birleşmesiniñ askeriy birlikleri ile talim keçirüvniñ teşkil etilmesine qıymet kesti».
2014 senesinde Qırım ilhaq etilgen soñ Rusiye yarımadada muntazam surette arbiy talimlerni ötkere. Ukrainanıñ Baş ştabında, Rusiyeniñ Qırımdaki areketlerine qanunsız deyler.
