Belli Rusiye advokatı Nikolay Polozov, Qırım sakinlerine qarşı repressiyalarğa narazılıq köstererek, kelecek Rusiye prezidenti saylavında rey bermekten açıq surette vazgeçti. Bunı o, özüniñ Facebooktaki saifesinde bildirdi.
Bir çoq işte Qırım sakinleriniñ qorçalayıcı olaraq iştirak etken Nikolay Polozov, şahsen onıñ içün saylavda iştirak etüv «asla qabul etilmez», dep iddia ete.
«Men, «saylavda» iştirak etip, avtomatik surette bütün bu cinayetlerniñ iştirakçisi olam. Men, saylav bölükke kelip, Oleg Sentsov (Qırımda terroristik akt teşkil etkeninde qabaatlanıp Rusiyede mahküm etildi – QA), Ruslan Zeytullayev (Hizb ut-Tahrir işi boyunca mahküm etilgen – QA) ve işğalni qabul etmegen onlarca diger Ukraina vatandaşını çoq yıllıq meddetlerge mahküm etken Rusiye akemniñ mantiyasını kiygen olam», – dep yaza o.
Ondan ğayrı, advokat, FSBniñ bastırıqlarında eziyetlevlerniñ qurbanları olğan diger Qırım sakinlerini de añıp keçe. Polozov: «Men, quşçıq qoyıp, qoluma elektroşoker alam ve onıñnen Renat Paralamovnı eziyetleyim (FSBde eziyetlengen Qırım sakini – QA), Aleksandr Kostenkonıñ qolunı qıram (Qırım sakini, Qırımda mahküm etilgen Avromeydan iştirakçisi – QA), Qırımda Rusiye telükesizlik hadimleri yapqan eziyetlevlerniñ diger qurbanlarını çekiştirem ve horlayım. Men, bülletenni urnağa taşlap, Ervin İbragimovnı (alıp qaçılğan ve habersiz ğayıp olğan Qırım sakini – QA) alıp qaçam, Reşat Ametovnıñ (Qırım ilhaqınıñ ilk qurbanı – QA) betine qurşun atam. Men işğalniñ bu dört yılı içinde bütün alıp qaçılğan ve eziyetlengenlerniñ aqrabalarını tesellisiz qaldıram. Men işğalden soñ babasız qalğan yüzden ziyade balanıñ betine tükürem. Men bu şerni üstüme almağa ve, Putinniñ bundan soñki qanuniyleştirüvinde iştirak etip, rejimniñ cinayetlerini paylaşmağa azırımmı? Bu sualge mart 18-de em işğal etilgen Qırımda, em de Rusiyede er kes özü içün özü cevap bermek kerek. Men endi özüm içün cevapnı sayladım», – dey.
Daa evel Qırımtatar Milliy Meclisiniñ reisi Refat Çubarov ve Rusiyedeki muhalefet lideri Aleksey Navalnıy Rusiyede prezident saylavını boykot etmege davet ettiler. Ondan ğayrı Rusiyede «Saylavcılarnıñ boykotı» tedbiri keçti.
Rusiye ve onıñ kontroli altında olğan Qırım ukümeti faal surette Rusiye ve Qırım sakinlerini mart 18-de keçecek prezident saylavı kününde saylav bölüklerine kelmege davet eteler.
