Rusiye tarafından yarımadanıñ qanunsız ilhaqına qarşı kirsetilgen sanktsiyalarnı yarımada bütünley Ukraina nezareti altına qaytqance devam ettirmeli dep bildirdi martnıñ 12-nde, Büyük Briytaniyanıñ Ukrainadaki elçihanesi.
Bunen bağlı beyanat diplomatik temsilcilikniñ Twitterinde derc etilgendir.
«4 yıl evel Rusiye Qırımnı qanunsız ilhaq eterek, alâ daa ealige öz akimiyetini qabul ettirmege tırışa. Qırım Ukraina terkibine keri qaytqance, bizler Qırımnı ilhaq etkeni içün Rusiye qarşı kirsetilgen sanktsiyalarnı devam», –denilmekte haberde.
Avropa birligi Şurası martnıñ 12-nde, Ukraina topraq bütünligi, suvereniteti ve mustaqilligine qast etüv ve bozıluvına alâqadar olğanlarğa qarşı AB tarafından kirsetilgen sanktsiyalarnı daa yarım yılğa uzattı. Sanktsiyalar 150 şahıs ve 38 teşkilâtnen alâqalı olaraq, 2018 senesi sentâbrniñ 15-ne qadar devam etecek.
Buña bir cevap olaraq AB daa bir sıra sanktsiyalar kirsetken edi, hususan: 2018 senesi iyülnin 31-ne qadar devam etecek Rusiye iqtisadiyatınıñ muayyen saalarına qarşı kirsetilen iqtisadiy sanktsiyalar; Rusiye tarafından yarımadanıñ qanunsız ilhaqına qarşı Qırım ve Aqyarda üküm sürecek sıñırlav tedbirler. Olar 2018 senesi iyunniñ 23-ne qadar devam etecek.
Buña beñzer sanktsiyalarnı ABD ve «Yedi devlet gruppası»na kirgen diger devletlernen beraber daa bir qaç devlet kirsetti.
