Qırım uquqimaye gruppası martnıñ 18-nde yarımadada qomşu Rusiye prezidenti saylâvlarınen alâqalı olaraq qırımlılarğa yapılğan tazyıqnın bir qaç faktını qayd etken. Bu aqta gruppanıñ saytında haber etilmekte.
QUG malümatına köre, Qırımnıñ «Qartlar ve saqatlar Oktâbrskiy pansionatı»nıñ reberleri saylâvlarğa barmağan qırımtatar hadimlerini işten boşatacağınen qorquzğan.
«QUGniñ diger bir menbası, Qırım mektepleriniñ birinde ana-baba toplaşuvı keçirilecegi aqqında haber etilgen ve anda mektep müdiri ocalarnıñ epsine saylâvlarnen bağlı resim sergisi keçirmekni avale etken. Ağzaviy buyruqnen müdir bütün ocalarnı saylâvlarda iştirak etmege zorlağan. Qırımnıñ diger mekteplerinden birinde balalarnı Rusiye prezidentiniñ saylâvlarınen bağlı plakatlar sızmağa mecbur ete ekenler. Bu aqta eki ayrı sınıfnıñ farqlı menbaları haber etken. Balalarnı yarışta iştirak etecekleri aqqındaki malümatnı kündeliklerine yazmağa mecbur etkenler. Yarış içün sızılğan resim martnıñ 13-ne qadar mektepke ketirilmeli eken», – denilmekte haberde.
Qırım uquqimaye gruppasınıñ yolbaşçısı Olga Skripnik yarımadanıñ Kreml nezareti altındaki akimiyetiniñ bu areketlerini qabul etilmez ve qanunsız areketler dep adlandıra.
«Yarımadada saylâvlarnı teşkil etken Rusiye akimiyeti bir daa halqara mecburiyetlerni inkâr ete. Qırımtatarlarnıñ saylâvlarda iştirak etmege red etkenleri içün işten boşatılacağınen qorquzılğanı, olarnıñ ictimaiy ve iqtisadiy uquqlarınıñ qaba bir şekilde bozıluvı, aynı zamanda etnik hususiyetine köre aşalanuv sayıla. Mektep talebeleriniñ er angi bir siyasiy teşviqatta iştirak etüvi, Rusiye qanunlarını köre bile qanunnıñ qaba bozıluvı sayıla. Qırımda Rusiye prezidentiniñ saylâvları içün insanlarnıñ mecbur etilüvinen bağlı iç bir areketlerniñ qabul etilmesi mümkün degil ve olar deral toqtatılmalıdır», – dep bayan etti Skripnik.
Qırımtatar halqınıñ Milliy Meclisi martnıñ 12-nde öz muracaatını bildirerek, qırımtatarlarnı ilhaq etilgen Qırımda keçirilecek Rusiye prezidentiniñ saylâvlarında iştirak etmemege.
Rusiye prezidenti saylavlarınıñ ötkerilmesi 2018 senesi mart 18-ne – Qırım ilhaqınıñ yıllığı qayd etilgen künge tayın etildi.
Martnıñ 1-nde Yuqarı Rada BMT Telükesizlik Şurası ve Baş Assambleyası, Avropa Birligi, NATO, halqara teşkilâtlar, çetel parlamentleri ve ükümetlerini Qırımda Rusiye saylavlarınıñ qanuniyligini tanımamağa çağırdı.
