Avropa Birligi Rusiye tarafından ilhaq etilgen Qırımda bu devletniñ prezidenti saylavındaki rey berüvniñ neticelerini tanımaycaq. Bunı Avropa komissiysınıñ vitse-prezidenti, ABniñ çetel işleri ve havsızlıq siyaseti boyunca yüksek temsilcisi Federika Mogerini Kyivde, Ukraina prezidenti Petro Poroşenko ile beraber bergen brifingde bildirdi.
Mogerini: «Bu ziyaret, Qırım ve Aqyarnıñ qanunsız ilhaqınıñ arfi-arfine dörtünci yıllığı arfesinde keçe. Biz bu qanunsız ilhaqnı tanımaymız ve tanımamaq boyunca siyasetimizni tatbiq etmege devam etecekmiz… Biz anda sözde saylavnı tanımaycaqmız, ve, degenim kibi, şu cümleden bunıñnen bağlı sanktsiyalar içün bizim tanımama siyasetimizniñ tam olaraq ömürge keçirilmesine sadıq qalacaqmız», – dedi.
Rusiye prezidenti saylavınıñ ötkerilmesi 2018 senesi mart 18-ne – Qırımnıñ Rusiye tarafından ilhaqınıñ yıllığına tayın etildi.
Ukraina prezidenti Petro Poroşenko dünya toplulığını ilhaq etilgen Qırımda Rusiye prezidentiniñ kelecekteki saylavı neticelerini tanımamağa davet etti.
Martnıñ 1-nde Yuqarı Rada BMT Telükesizlik Şurası ve Baş Assambleyası, Avropa Birligi, NATO, halqara teşkilâtlar, çetel parlamentleri ve ükümetlerini Qırımda Rusiye saylavınıñ qanuniyligini tanımamağa davet etti.
Qırım Muhtar Cumhuriyeti Prokuraturası Ukraina vatandaşlarını, olarnıñ Qırımda Rusiye saylavı ötkerilmesiniñ teşkil etilmesinde iştirak etmeleri taqdirde Ukraina Cinaiy kodeksiniñ «devletke hainlik» maddesi boyunca mesuliyetke çekile bileceklerini bildire.
