Brüsselde martnıñ 6-sında Ukraina aq-uquq qorçalayıcılarınıñ ABniñ Şarqiy Avropa ve Merkeziy Asiya meseleleri boyunca İş gruppası (COEST) ile ğayrı-resmiy körüşüvi olıp keçti. Onda Rusiye tarafından ilhaq etilgen Qırımda insan aqlarınıñ bozuluvı muzakere etildi. Bunı özüniñ Facebooktaki saifesinde Ukraina İnsan aqları aqqında malümat merkezi idaresiniñ reisi Tatyana Peçonçik bildire.
Aq-uquq qorçalayıcısı: «Qırımda insan aqları saasındaki vaziyet, siyasiy mabüslerniñ vaziyeti, işğalci ukümetniñ arbiy cinayetleri ve halqara uquqnıñ bozması, qırımtatar halqına qarşı repressiyalar, Qırım sakinleriniñ askerlikke alınması, jurnalistler ve blogerlerniñ taqip etilmesi, yerli vatandaşlar teşebbüslerine tazyıq, Qırımda Putinniñ qanunsız saylavı, Qırımğa çetel advokatları ve aq-uquq qorçalayıcılarınıñ kele bilmeleri probleması ve ondan ğayrı yañı sanktsiyalar aqqında laf ettik», – dep yazdı.
Ondan ğayrı körüşüvde Avropa Birligi Tış hizmetiniñ Şarqiy ortaqlıq meseleleri boyunca bölüginiñ başlığı Dirk Şubel iştirak etti.
Qırım Rusiye tarafından ilhaqın etilgen soñ mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalarından dolayı şübheli tanılğan Qırım musulmanlarınıñ evleri ketken sayın daa sıq kütleviy surette tintile.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini inkâr etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
