Qırımtatar halqı Milliy Meclis reisiniñ muavinleri İlmi Umerov ve Ahtem Çiygoz Litva prezidenti Dalia Grybauskaiteve Litva Seyminiñ spikeri Viktoras Pranckietis ile körüştiler. Qırım.Aqiqatqa martnıñ 5-nde bu aqta körüşüvniñ iştirakçisi İlmi Umerov ikâye etip berdi.
«Bugün bizler prezident ve parlament spikerinen körüştik. Bizim taraftan bu bir nezaket ziyareti sayılır: biz Litva ve Litva yolbaşçılarına minnetdarlığıznı izhar etmek istedik. Olarnıñ noqta-i nazarı, olar Ukrainanıñ eñ işançlı dostları olıp çıqqanları içün. Avropa parlamentinde Qırımtatar Milliy Meclisiniñ bir soy informatsion bürosı açmaq meselesinde Litvanıñ qoltutacağını muzakere ettik. Hansaray bağlı vaziyetni de muzakere ettik», – dedi Umerov.
Onıñ sözlerine köre, Litvada «Hansaraynıñ rekonstruktsiyası» meselesi boyunca halqara konferentsiya keçirilüv ihtimali laf etildi.
Daa evel Qırımtatar Milliy Meclisiniñ reisi Refat Çubarov,Qırımtatar Milliy Meclisi reisiniñ muavinleri İlmi Umerov ve Ahtem Çiygoz martnıñ 4-dü ve 5-nde bazı körüşüvler keçirmek, şu cümleden bu devletniñ prezidenti Dalia Grybauskaitenen körüşmek maqsadınen, Litvanıñ paytahtına barğanları aqqında haber etken edi.
2017 senesi sentâbr ayında Kreml nezaretindeki Qırım Yuqarı mahkemesi Ahtem Çiygoznı 8 yıllık koloniya cezasına mahküm etken edi. O, 2015 senesi yanvar ayında 2014 senesi fevralniñ 26-nda Qırım Yuqaru Şurası binasınıñ ögünde Ukrainanıñ topraq bütünligine bağışlanğan mitingde iştirak etkeni içün tutulıp alındı. Çiygoz kütleviy nizamsızlıqlar teşkil etmekte qabaatlanğan edi.
Ondan soñ mahkeme İlmi Umerovnı Qırımda eki yıl köy tarzındaki koloniyada qaluv cezasına mahküm etken edi. Umerov açıq menbalarda yapılğan separatizmge çağıruv yapmaqta qabaatlandı.
Rusiye akimiyeti oktâbrniñ 25-nde Umerov ve Çiygoznı azat etip, Türkiyege teslim etti. Daa soñra azat etilgen qırımtatar halqı Milliy Meclisiniñ yolbaşçıları Kyivge keldiler.
