Qırım ve Aqyar musulmanlarınıñ diniy idaresi (QAMDİ) muftisiniñ muavini Ayder İsmailov iş gruppası tarafından «işğal vaqtında natsistler tarafından yaqılğan Qırım köyleri içün» reparatsiyalar aluv boyunca azırlıq «yol haritası»nıñ azırlanğanı aqqında bildirdi. Bu hususta «Krıminform» yaza.
Neşir: «Bizim tarafımızdan «yol haritası» işlep çıqıldı. Biz, evelden de iş tutqan uquqçılarımıznı davet etip, olar bu mesele boyunca belli bir tetqiqatlar yaptı. Şimdi biz bu meseleniñ ögrenilmesi boyunca komissiyanıñ meydanğa ketirilmesi basamağında bulunamız. Ondan ğayrı, dört alt gruppanı: arhiv gruppası, tarih ve içtimaiyatçılardan ibaret gruppa, iqtisadiyatçılar ve adliyeciler gruppalarını meydanğa ketirecegimizni qararlaştırdıq», – dep, İsmailovnıñ sözlerini naqil ete.
Daa evel QAMDİ, toplaşuv keçirip, onda Kremlniñ kontroli altında olğan «Qırımtatarlarnıñ şurası»nı meydanğa ketirmege qarar berildi. Toplaşuvnıñ iştirakçileri Almaniyadan Ekinci cian cenki vaqtında yaqılğan köyler içün reparatsiyalar talap etmek istegenleri aqqında bildirdiler.Rusiye Devlet dumasınıñ Qırımdan deputatı Ruslan Balbekniñ aytqanına köre, reparatsiyalar boyunca arizanı maddiy talap olaraq degil de, siyasiy jest olaraq qabul etmeli.
2014 senesinde yarımada Rusiye tarafından ilhaq etilgen soñ Qırım musulmanlarınıñ diniy idaresi öz areketlerini Meclisnen koordinatsiya etmekten vazgeçti ve Rusiyeniñ qanunları boyunca Qırım ve Aqyar musulmanlarınıñ diniy idaresi (QAMDİ) olaraq ğayrıdan resmiy qaydından keçti.
2016 senesiniñ noyabrinde Qırımdan köçken musulmanlarnıñ cemaatları qurultay tolap, onda Ukrainanıñ qıtadaki qısmında Qırım Muhtar Cumhuriyeti musulmanlarınıñ diniy idaresini meydanğa ketirmege qarar berdiler. Mufti vazifesine Ayder Rustemov saylandı.
2017 senesiniñ oktâbrinde Ukraina Medeniyet nazirliginiñ milletler ve dinler departamenti Rustemov başlığındaki Qırım Muhtar Cumhuriyeti musulmanlarınıñ diniy idaresini resmen qayd etti.
