2017 senesi devamında Qırımda söz serbestligine basqı yapıluv, toplaşuvlarnı taqip etüv, insanlarnı qorqızuvlar devam ettirildi, dep haber etile Amnesty International halqara uquqimaye teşkilâtınıñ maruzasında.
Vesiqada, Kreml nezaretindeki Qırım ükümeti «qırımtatarlarnıñ aq-uquqlarını er türlü yolnen bastırmağa devam etti» dep qayd etile. Ayrıca, qırımtatar Milliy Meclisiniñ Qırımda yasaqlanuvı ale daa devam ete, dep qayd ete maruzanıñ muellfileri.
Rusiyeli hususiy hızmet hadimleri «qorqızuv kampaniyasınıñ büyük bir qısmı» şeklinde onlarnen qırımtatarlarnıñ evinde tintüv keçirgeni aqqında haber etile.
«Bu arada Rusiye tenqitçıleriniñ aqlarını qorçalamağa advokatlar pek az bir qısmı yanaşa, çünki ondan soñ olar da taqipke oğray», – denilmekte vesiqada.
Meselâ, advokat Emil Kurbedinov ictimaiy ağlardaki haberi içün tevqif etilerek, 10 künge apiske qapatılğan edi.
Amnesty International halqara uquqimaye teşkilâtınıñ yañı maruzası 2017 senesi dünyanıñ 159 devletindeki insanlarnıñ aq-uquq vaziyetine qıymet kese. Tedqiqatçılarnıñ malümatına köre, talil neticeleri «bir çoq insanlar aq-uquqları içün öz ükümetlerine qarşı tınmay küreşkenini» köstere.
Uquqimayecileri Ukrainadaki hususiy hızmetlerniñ «gizli apishane» denilgen yerlerine ve telükesizlik organaları tarafından insanlarnıñ aqsızca tutulğanına diqqat çeke. Ayrıca söz, Rusiye tatafından ilhaq etilgen Qırım ve rusiyeli gibrid küçler nezareti altında bulunğan Donbasstaki insan aqları aqqında yürsetile.
