Qırımtatar Milliy Meclisiniñ Alusta sabıq reisi Enver Arpatlı Rusiyeniñ Qaraçay-Çerkes Cumhuriyeti ükümetiniñ reis muavini vazifesine tayin etildi. Bu aqta fevralniñ 19-nda rusiyeli «İnterfaks» haber etmekte.
«İnterfaks-Yug» neşirine Rusiyeniñ Qaraçay-Çerkes Cumhuriyeti ükümetiniñ reisi haber etkenine köre, yañı vitse-premyerniñ taqdim merasimi bazarertesi künü yapılacaq eken.
«Alınğan ilk malümatqa köre, Enver Arpatlı Qaraçay-Çerkes Cumhuriyeti nazirler şurasında yatırım ve innovatsiyalar yönelişini yürsetecek eken. O, iqtisadiy inkişaf ve sanayı ticaret nazirlikleriniñ işlerine baqacaq eken», – dedi agentlikteki subetdeş.
Enver Arpaytlı tayin etilgeni aqqındaki malümatnı «Tatar-inform» neşirine tasdıqlay. «Ebet, resmiy taqdim merasimi bugün cumhuriyet ükümetiniñ oturışuvında yapıldı», – dep haber ete Arpatlı.
Arpatlı Temiryasev adına Qazan innovatsion universitetiniñ iqtisadiyat fakülteti ve Qırım Milliy uquq universitetiniñ mezunu ola. Aluşta şeer memuriyeti yolbaşçısınıñ muavini vazifesinde çalışa, 2017 senesi Tatarstannıñ Pestreçinskiy rayonı reberiniñ birinci muavini vazifesine tayin etile.
Enver Arpatlı– «Çiygoz işi» ve 2014 senesi fevralniñ 26-nda Qırım Yuqarı Şurası ögündeki «kütleviy nizamsızlıqlar»nıñ şaatı ola. O mitingte iştirak etip, daaa soñra Rusiye mehkemesinde Qırımtatar Milliy Meclisi reisiniñ muavini Ahtem Çiygoznıñ işi boyunca şaatlıq yapqan birisidir.
