Fevralniñ 4-nde Aqmescitniñ Strelkovaya mikrorayonında yerli «narazılıq meydanınıñ» faalleri miting keçirerek, Rusiye prezidenti Vladimir Putinni «ev meskenler ve caminiñ yıquvdan qorçalamasına» çağırdı.
Qırım.Aqiqat muhbiri haber etkenine köre, aktsiya şeerniñ rusiyeli akimiyeti yıqmağa istegen cami binasında keçken.
Toplanğan faaller Rusiye prezidenti Vladimir Putinge olarnıñ mikrorayonını qurucılıqtan qurtarmasınen bağlı muracaat yazılğan üç dane büyük plakat tiklep qoyğanlar. Plakatlar üzerinde: «Prezident! Bizim evlerimiznen caminiyıquvdan qorçala», «Prezident! Qırım akimiyetiniñ aqsızlıqlarını toqtat», «Prezidentnen körüşüv talap etemiz», dep yazılğan.
Faaller öz evlerine qorçalamaq içün Moskvağa ketmege azır olğanlarını iddia ete. Anda olar öz plakatlarını Kreml ögünde numayış etmek niyetindeler.
«Narazılıq meydanınıñ» faallerinden biri olğan Fazıl İbraimov açlıq ilân etken. Oña digerleri de qoşulğan. Faallerniñ ekseriyeti nevbetnen üçer kün açlıq tutmağa niyetleneler.
«Qırım kazaklarınıñ» temsilcileri de miting iştirak etken, amma camige kirmegenler.
Strelkovaya «narazılıq meydanı» yerleşken yerde «Krımskaya roza» adlı 9 biñ kişilik yañı rayon qurulması planlaştırıla. Mesken evlerden ğayrı bu yerde mektep, balalar bağçası, sport kompleksi ve tükânlar qurulması planlaştırıla. Şimdi mında esasen repatriantlar yaşay.
Bu ihtilâf aqqında tafsilâtlıca Qırım.Aqiqat saytınıñ materiallerında oquñız.
