Küç idaresi hadimleriniñ «Qırım birdemligi» cemaat teşkilâtınıñ toplaşuvına ilk defa bu şekilde kirip keleler, dep bildire İnsan aqları boyunca Qırım kontakt gruppasınıñ koordinatorı Abdureşit Cepparov.
Onıñ sözlerine köre, teşkilât toplaşuvınıñ iştirakçileri ilk defa böyle bir şeynen qarşılaşalar.
Cepparov prezident Petro Poroşenko, Yuqarı Rada ve devletniñ diger organları olaraq Ukraina akimiyetinden Sudaqtaki (yanvarniñ 27-nde bu yerde toplaşuv keçirildi - QA) vaziyetke ve yarımadanıñ mevcut organlar tarafından toplaşuv serbestliginen alâqalı taqipler ve sıñırlavlarnen bağlı bütün davalarına qarşılıq kösterilmesine çağıra.
Daa evel yanvarniñ 27-nde Sudaqta keçken «Qırım birdemligi» cemaat teşkilâtınıñ toplaşuvına rusiyeli OMON hadimleri yetişip kelgeni aqqında haber etilgen edi. Küç idaresi hadimleriniñ sözlerine köre, birisi telefon açıp, «şu adreste silâ bulundırılğan bir toplaşuv keçirile» degen eken.
Şimdilik Qirim uquqqoruyıcı organlarınıñ bu vaziyetten alâqalı izaatı yoq.
Qırım işğalinden soñ yarımadada rusiyeli akimiyet mustaqil jurnalistler, cemaat ve qırımtatar Milliy areketiniñ faalleri, Meclis azaları ve «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilmege başladı.
