Qırımnıñ Aqmescit rayonı Novıy Mir köyüniñ sakini İsmail Ramazanovnıñ evinde tintüv keçirilgen soñ, rusiyeli küç idaresiniñ hadimleri onı köteklegen. Bu aqta yanvarniñ 23-nde Qırım.Aqiqatqa bergen izaatında advokat Mammet Mambetov ikâye etmekte.
«Onıñ aqrabaları mennen bağlanıp, onı imaye etmekni rica etti. Men o alıp ketilgen Taqiqat komitetiniñ taqiqatçisinen bağladım. Onen telefonda biraz laf etmege fırsatım olğanı içün, oña onıñ aq-uquqları aqqında ayttım. İşte bu arada o Taqiqat komitetine alıp ketkenlerinde onı köteklegenleri aqqında aytıp yetiştirdi. Şu arada elinden telefonnı çekip aldılar», – dep ikâye etti Mambetov.
Onıñ sözlerine köre, tintüv esnasında onıñ evinden pıştav patronları «tapqan ekenler» emiş.
«Saba saat dörtte kelgenler. Qapunı pek müşkil qaqqanlar. Olarnı kirsetkenler: maskalı ve sade vatandaş urbası kiygen insanlar kirgen, kimse bir şeyni sındırmağan. Aqrabalarınıñ sözlerine köre, odalarnıñ birinde Makarov pıştavına kelişken ve içinde patronlar olğan paketçik tapqanlar. İşte, neticede onı Taqiqat komitetine alıp ketkenler», – dey advokat.
Mambetovnıñ malümatına köre, tutulıp alınğan İsmail Ramazanov dindar bir musulman eken.
Yanvarniñ 23-nde ilhaq etilgen Qırımnıñ Aqmescit ve İslâm-Terek rayonlarında rusiyeli küç idaresiniñ hadimleri tintüvler ötkerdi.
Faaller bergen malümatqa köre, küç idaresiniñ hadimleri Novıy Mir köyünde (Aqmescit rayonı Rodnikovoye köyüniñ artında yerleşmekte) yaşağan İsmail Ramazanovnıñ evinde tintüv keçirip, onı ekstremizm propagandası yapqanında qabaatlağanlar.
Eski Qırımda tüntüv 27 yaşındaki aydavcı Muhsin Cambaznıñ evinde ötkerilgen.
Rusiyeli küç idaresi strukturalarınıñ saytlarında tintüvnen alâqalı malümat yoq.
Qırım işğalinden soñ yarımadada mustaqil jurnalistler, cemaat ve qırımtatar milliy areketiniñ faalleri, Meclis azaları ve «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilmege başladı.
