Qırım Muhtar Cumhuriyeti Yuqarı Şurasınıñ deputatı, «Fiolent» zavodınıñ direktorı, «Ukraina qaramanı» unvanınen taqdirlengen Aleksandr Batalin, Qırımnıñ Rusiye tarafından ilhaq etkenine qol tutqanı içün devlet hainliginde qabaatlanmaqta.
Bu aqta ATR telekanalına bergen izaatında Qırım MC prokurorının muavini Aleksandr Udoviçenko ikâye etip berdi.
«Qırım MC prokuraturası mahkemege Ukraina Cinaiy kodeksiniñ «devlet hainligi»nen bağlı 111 maddesi 1 qısmı mucibi Batalinen bağlı qabaatlav aktı yolladı. Bu qabaatlav onıñ 2014 senesi rey berüvi esasında diger şeylerden ğayrı yarımadanıñ ilhaq etilmesine sebep olğanı içün yollanıldı», – dey Udoviçenko, Qırım MC prokuraturası Facebookta derc etken izaatında.
Başqa-başqa yıllarda «Ukraina qaramanı» unvanınen taqdirlengen Qırımnıñ beş sakini Qırımnıñ ilhaq etilüvine qol tutqan ediler. Olar arasında Yekaterina Gordeyçuk, Fevzi Yakubov, Nikolay Boyko, Aleksandr Batalin ve artıq alemden keçken Nikolay Bagrov bar.
2017 senesi dekabr ayı itibarınen, Qırım MC Yuqarı Şurasınıñ 75 deputatı qıdıruvda bulunmaqta.
2014 senesi martnıñ 16-nda Qırım ve Aqyarda yarımadanıñ statusı boyunca dünyada qabul etilmegen referendum ötkerildi. Bunıñ neticesinde Rusiye Qırımnı özüne qoşqanını ilân etti. Ukraina, Avropa birligi ve ABD bunı tanımayıp, Qırım Rusiye tarafında işğal etilgenini tasdiqladılar. Martnıñ 18-nde Rusiye prezidenti Vladimir Putin Qırımnı Rusiyege «qoşulğanı» aqqında ilân etti.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
