İçinde 2014 senesi fevralinden 2017 senesi oktâbrniñ 31-ne qadar yarımadada insan aqlarınıñ bozuluvları toplanğan «Rusiye tarafından ilhaq etilgen soñ Qırımda repressiyalar entsiklopediyası» adlı Ukraina aq-uquq qorçalayıcılarınıñ tetqiqatı kitaphaneler ve devlet institutlarına berilecek. Bunı yanvarniñ 15-nde «QırımSOS» aq-uquq qorçalayıcıları teşkilâtınıñ koordinatorı Tamila Taşeva bildirdi.
Onıñ aytqanına köre, muellifler kitapnıñ nüshalarını matbuattan alıp, dağıtacaq olalar. Aynı zamanda onıñ satılması közde tutulmay.
Taşeva Qırım.Aqiqatqa: «Esabatqa 2014 senesi fevralniñ soñundan 2017 senesi oktâbrniñ 31-ne qadar muddet içinde yapılğan insan aqlarınıñ bozuluvları kirdi. Onıñ üstünde büyük bir grup çalıştı. Bir çoq insan bu işten em fizikiy, em de emotsional ceetten soñ derece yoruldı. Lâkin biz bu işniñ vesiqalılaştıruv ve qabaatlılarnı cevapkârlıqqa çeküv içün ne derecede muim olğanını bilemiz. Kitapnıñ unikal kodu olğanı içün biz onı kitaphanelerge bere bilecekmiz ve anda onıñnen yalıñız Qırımda insan aqları meseleleri boyunca çalışqan adamlar degil, aynı zamanda bütün meraqlanğanlar da çalışa bilecekler», – dedi.
Aq-uquq qorçalayıcıları, söz esabatnıñ birinci qısmı aqqında yürsetile, deyler. Muellifler tetqiqatnıñ ekinci qısmını 2018 senesinde neşriyatqa bermege ümüt eteler.
Dekabrniñ 4-nde Kyivde «QırımSOS» cemiyet teşkilâtı « Rusiye tarafından ilhaq etilgen soñ Qırımda repressiyalar entsiklopediyası» tetqiqatını taqdim etti. Esabatnıñ birinci qısmına eñ ağır bozuluvlar: eziyetlev, zalımca munasebet, zorbalıq ile alıp qaçuv ve öldürüv adiseleri kirdi. Esabat beş babdan ve insan aqlarınıñ muayen bozuluvları tasvir etilgen 350-den ziyade saifeden ibaret.
Rusiye tarafından ilhaqından soñ Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqalı deye şübhe altında tutulğan Qırım musulmanlarınıñ evlerinde ketken sayın daa sıq surette tintüvler yapıla.
