Rusiye Devlet dumasınıñ SNG ve yurtdaşlar ile alâqaları boyunca komiteti reisiniñ birinci muavini Konstantin Zatulin Rusiye ile Ukraina arasındaki Dostluq, emekdaşlıq ve ortaqlıq aqqında muqaveleniñ bir-biriniñ territorial sıñırlarını tanuv qısmını denonsatsiya etmege teklif etti. Bunı RİA Novosti agentligi bildire.
Zatulin: «Çünki emekdaşlıq ve dostluq mehanizmlerini tayin etmeyip, muqaveleniñ ekinci maddesinde biz Ukrainanıñ territorial sıñırlarını tanıymız, olar ise, munasip şekilde, bu vesiqanıñ imzalanması ve ratifikatsiyası anında bizmkidir. Yani mesele şu ki, Rusiye, bu muqaveleni 1997-de imzalap, ve ondan soñ 1999 senesinde ratifikatsiya etkende, deyelim, Qırım ve Aqyarnı Ukraina territoriyasınıñ qısmı sayğanını tasdiqladı», – dep qayd etti.
Rusiye ile Ukaina arasında Dostluq, emekdaşlıq ve ortaqlıq aqqında muqavele 1999 senesinde qabul etildi. Devlet duması onı yanvarniñ 14-nde, Yuqarı Rada ise yanvarniñ 25-nde ratifikatsiya ettiler. 2008 senesiniñ soñunda muqaveleniñ cariy olması muddeti avtomatik olaraq 10 yılğa uzatıldı.
40-ncı maddege binaen, eger eki taraftan iç birisi nevbetteki on yıllıq muddetniñ soñuna qadar eñ az 6 ay qalğanda ekinci tarafnı yazılı şekilde muqaveleni lâğu etmek niyetinde olğanı aqqında haberdar etmese, muqaveleniñ cariy olması muddeti avtomatik olaraq nevbetteki on yıllıq muddetlerge uzatılacaq.
Qırım ve Aqyar şeeri territoriyasında 2014 senesi martnıñ 16-sında yarımadanıñ statusına dair dünya tarafından tanılmağan referendum ötkerildi. Rusiye, onıñ neticesine esaslanıp, Qırımnı öz toprağına qoştı. Ne Ukraina, ne Avropa Birligi, ne de AQŞ referendumdaki rey berüvniñ neticelerini tanımadılar. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtları Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey.Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
