Bağçasaraydaki Han sarayında sözde qazağa qarşı işlerni yapqan Rusiye şirketleri tarihiy abideniñ autentikligini mahv eteler. Bunı Qırım.Aqiqat Radiosınıñ canlı efirinde QMC Milletlerara munasebetler ve sürgün etilgen vatandaşlarnıñ işleri boyunca Cumhuriyet komitetiniñ sabıq rehberi Edem Dudakov söyledi.
Faaliyetçi: «Restavratsiya bam-başqa şekilde yapıla: bir şeyni sıfırdan başlap yañıdan yapmaq kerek olsa bile, mimari abidesiniñ yaratıcıları tarafından qullanılğan tehnologiyalar ve malzemelerniñ aynısını qullanalar. Bu, yañıdan yapılğan kopiya olmamalı – obyekt autentikligini ğayıp etecek. Anda kiramet qalmasa, Han sarayı amelde UNESCO obyekti sıfatını ğayıp etecek. Maña köre, Ukraina abideniñ statusını, maalliy emiyetke malik statusından milliy emiyetke malik statusına qadar yükseltmek kerek. O zaman, dünya cemaatı da, belki, bu meselege diqqat eter», – dep qayd etti.
Bağçasaraydaki Han sarayında Qırımnıñ Rusiyege tabi akimiyetiniñ teşebbüsinen qazağa qarşı işler devam etile. Şaatlarnıñ aytqanlarına köre, saraynıñ baş binası etrafında ağır demir karkas qurula, onı üstten qoruma damınen örtecek olalar. Mutehassıslar, konstruktsiyanıñ ağırlığından topraq çökmek mümkün, dep qorqalar. Ondan ğayrı, işçiler mezar sanduqaları ve caminiñ kalligrafik yazılarını muafaza etmek içün mahsus qorumalar qoymadı, qadimiy ağaç pekitmeleri üstüne ise asıl da beton töktiler.
Daa evel Qırım adliyecileri ve advokatları Bağçasaraydaki Han sarayını qorçalav boyunca uquqiy kampaniyanı başlamaq niyet etkenleri aqqında bildirdiler.
