Eki Amerika arbiy uçağı – deñiz keşfiyatçısı P-8A Poseidon ve uzaq menzilli uçucısız ağır RQ-4A Global Hawk yanvar 7-de Qırımnıñ territoriyasını qaplap alğan keniş mıqyaslı bir keşfiyat operatsiyasını amelge keçirdiler. Bunı, Ğarp avacılıq resurslarınıñ monitoring malümatlarına esaslanıp, «İnterfaks-Ukraina» haber agentligi bildire.
Misal içün, olranıñ malümatına köre, Donbassta ayırma sızığı boyunca keşfiyat yapqan kögertesinde 12-2050 nomeralı AQŞ Arbiy ava quvetleriniñ (AAQ) Global Hawk uçucısız uçqan apparat bundan soñ bir qaç saat devamında ğarptaki ucundan tutıp, Keriç boğazına qadar Qırım yalısı boyunca uçuş yaptı, dep yaza neşir.
«İnterfaks-Ukraina»nıñ bildirgenine köre, aynı zamanda İtaliyadaki Siciliya adasında bulunğan Sigonella uçaq bazasından avağa köterilgen ve Aqyar yanında qayd etilgen, kögertesinde 168432 nomeralı, PS076 adı ile bağ tutqan AQŞ AAQnıñ gemilerge qarşı P-8A Poseidon keşfiyat qolu uçağı, ondan ğayrı, ilhaq etilgen yarımadadan tutıp, ğarp ve cenüp taraflarına uçuşlar yaptı.
Ukrainanıñ qıtadaki qısmınıñ, ilhaq etilgen Qırımnıñ ve qomşu Rusiyeniñ akimiyetleri tarafından bu malümat şimdilik resmen tasdiqlanmadı.
2017 senesi noyabr 7-de Qırım ile memuriy sıñır yanında Rusiyeniñ uçucısız uçağı keşif etildi.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ve yarımada arasında şeklen memuriy ve amelde aqiqiy «sıñır» peyda oldı. Memuriy sıñırda üç kontrol kiriş/çıqış noqtası çalışa – «Kalançak», «Çonğar» ve «Çaplinka».
Qırımnıñ ilhaqından soñ Rusiye akimiyeti Qırım sakinlerini öz ordusınıñ saflarına alalar. Yarımadada bir çoq kütleviy tedbirlerde Rusiye Silâlı quvetlerinde hizmet etüv teşviqatı yapıla. Halqara qanunları ve BMT Baş assambleyasınıñ qararlarına baqmadan Qırım sakinlerini Rusiye ordusına hizmetke kirmege çağıralar.
