Yanvar 5 cuma künü Aqmescitte eki Qırım sakininiñ evinde tintüvler yapıla. Bunı «Qırım birdemligi» birleşmesi Facebookta bildire.
Faaliyetçilerniñ malümatına köre, tintüvler Lesi Ukrainki rayonınıñ Usadebnaya (Markoviça) soqağı 34 ve Turistov soqağı 49 adresleri boyunca yapıla.
Tintüvler, doğmuş qardaşlar olğan eki qadın – Hatice Kantemirova ve Zera Bazirovanıñ evlerinde yapıla.
Qırım.Aqiqat olıp keçkenniñ tafsilâtlarını tayin ete.
Qırım Rusiye tarafından ilhaq etilgen soñ yarımadada muntazam surette mustaqil jurnalistler, qırımtatar faaliyetçileri, muhalefet ve Ukraina tarafını tutqan cemiyet erbapları ve diniy azlıqlar vekilleriniñ yaqalanuvları, tintüvleri ve sorğulamaları yapıla. Aq-uquq qorçalayıcıları Rusiye telükesizlik hadimleriniñ bu areketlerine siyasiy maqsatlı areketler deyler.
