Ішкі істер министрлігінің ақпары бойынша, елімізде ішімдікке құмар 126 мыңға жуық адам ресми есепке енгізілген. Ал соңғы үш жылда арақтың кесірінен 55962 өрт оқиғасы тіркеліп, одан 1138 адам көз жұмған. Алты жылда ел аумағында 4833 жол-көлік апаты болып, одан 977 адам қаза тауып, 7027 адам жарақаттанған. Міне, бір ғана «ащы судың» кесірі қаншама жанның өкінішіне, көз жасына айналып отыр.
Ойланатын кез келді. Біле білсек, арақ – бар бәлекеттің көзі. Арақ ішкен адам кез келген күнә іске бейім болады. Содан барып қазір әрбір екінші қазақстандық еркек жыныстық аурулармен ауырады. Бұл дерек қайдан шықты? Астанадағы урология орталығының эндокринолог, уролог мамандары еркектерге арнап үш күндік кеңес беру акциясын өткізген. Нәтижесінде дәрігерлерге қаралған 800 еркектің 480-інен урологиялық аурулардың бар екені анықталған. Сондай-ақ, кардиолог маманның қабылдауында болғандардың 43 пайызы артериялық және симптоматикалық гипертензиямен ауыратыны анықталған. Эндрокринологқа қаралғандардың 56 пайызына сусамыр диагнозы қойылған. Перзент сүйе алмаған 100 жұптың ішінен 40-60 пайызы еркектердің белсіздігінен бала көре алмай отырғаны дәлелденді. Бұл сұмдық қой!...