Қалада да, ауылда да үй, кеңсе бөлмелерінде гүлдер мен түрлі өсімдіктерді өсірмейтін адамдар аз. Мамандардың айтуынша, осындай жасыл желектердің де өз табиғаты, «мінезі» болды. Сол себепті, бөлмені гүл, өсімдіктермен безендірмес бұрын олар туралы ақыл-кеңестерді естіп, оқып білген жөн. Біз бүгін «Шаңырақ» энциклопедиясы, «Төрлетіңіз» журналы тәрізді басылым, кітаптардағы мамандардың бөлме гүлдерін орналастыру туралы ойлары мен ұсыныстарын сіздердің назарларыңызға ұсынамыз.
«Бөлме гүлдерін отырғызар кезде, ең тиімдісі – қай тұсқа қойғанда жақсы өседі, соны біліп барып орналастырған жөн. Мәселен, герань гүлі салқынды ұнатады және күннің ең ыстығына төтеп бере алады. Сондықтан, оны бөлменің оңтүстік жағындағы терезге қойған дұрыс. Негізі, гүл атаулының барлығы күн көзін сүйеді. Дегенмен, үйдің солтүстік, солтүстік-шығыс бетінде әдемі жайқалатын гүлдер де бар. Ол шегіргүл (фиалка). Себебі, оңтүстік тұстан ол күйіп кетеді.
Кактустың жайы – оңтүстік. Сансиверия көлеңкелі күңгірт жерде өсе береді, кез-келген бұрышқа қойсаңыз жарасады. Ал жатын бөлмені бегония, лилиямен жемдейді. Үйдегі қонақ бөлмені аса көлемді ашық түсті гүлдермен көркемдеуге болады. Үйге жайлылық пен әсемдік беріп тұратын гүлдер – амариллис, пальма. Бұлардың барлығы да қолдан оңай сатып алынатын гүлдер.
Ал үйге емдік қасиеті бар алоэ, каланхоэ, дроцен, «ақша» ағашы, ащы бұрыш пен декоративті қызанақтар отырғызғаныңыз абзал. Оның қасына жалбыз бен мелисс өсірсеңіз де артық емес. Кіреберіс дәлізге ең дұрысы – жапырағы қалың, етті, жалпақ тілмен айтқанда, танымал гүлдердің арасынан «ененің тілі» атты гүлдер үйлеседі.
«Вампир» гүлдерден сақтаныңыз
Мұндай да гүлдер бар. Әсіресе, «кәдімгі монстр» деп аталатын гүл – «вампир» гүлдердің ішіндегі «зұлымы». Лажы болса, оны үйге қоюдан гөрі кеңсеге лайық келеді. Өйткені, ол бас ауруы, әлсіздік, ұйқышылдық ауруын шақырады. Кеңсеге отырғызу керек дейтін себебіміз – адамның энергиясымен қоректенетін болғандықтан, яғни, неғұрлым энергия көп болған жерде, солғұрлым жағымсыз теріс күштер мен қуатты өзіне тартып алып, кеңсе ішін «тазарта» түседі. Айтпақшы, қырыққұлақтың (папортник) барлық түрі де сондай, оны үй жағдайында өсіргеннен гөрі, кеңсеге қойған қолайлы деп есептеледі.
Олеандра атты гүлді балаларға иіскетпегеніңіз жөн. Оның қабығы улы болып келеді. Ол да кеңсе гүліне жатады.
Көлеңкеге қойылатын гүлдер
Егерде гүлдің жапырағы қара қою түсті, қалың етті, қанық болып келсе, олар көлеңкеде ұсталатын гүлдер. Оның кескініне көз салыңыз, барлық сұйықты өзіне тартып алады. Ұзақты күнге өзіне жинап алған «қорекпен» тіршілік ете алатын қасиеті бар. Мұндай гүлдерді терезенің қақ алдына емес, қабырға тұсқа, бұрыштарға қойсаңыз болады, шкаф үсті де таптырмайтын орын. Бөлме температурасында өсетін болғандықтан, аса күтім қажет емес. Үйдің бос бұрышына пальмалар, декоративті раушандар, лимондар жақсы жарасым табады. Бұлардың барлығы еденге жақсы жайғасады. Терезеге ұмтылмайтындықтан, әрқайсысын бөлек етіп, барлығын бір бұрышқа жинап, жиынтық жасасаңыз, бөлмеңіз жайнап шыға келеді. Егер гүлдердің айналасын мұхит тастарымен қоршап, сәндейтін болсаңыз, альпілік таулардан бір кем емес көрініс аласыз. Сондай-ақ, бөлмеңіз күңгірт, жөндеуді қажет ететін болса, оны бөлме гүлдерімен көмкеріп, ашық түсті гүлдерді қолдана отырып, бөлменің ескілігін білдіртпей жіберуге болады. Әсіресе, ашық, қанық түстерді жатын бөлмеге қойсаңыз әрі ем, әрі демалыс сыйлайды. Егер сіз көктемде қалжырап, күшіңіздің кеміп жүргенін байқасаңыз, дереу қанық қызыл, ашық қызыл, қызғылт, сәбіз түстес гүлдерді таңдаңыз. Мысалы, желтоқсан кактусы (декабрист). Ол бір орыннан екінші орынға ауыстырғанды жақтырмайды. Ауыстырған жағдайда топырағы көгере бастайды. Сондықтан оны сол бұрынғы жатын бөлмеден қозғамағаныңыз жөн.
Гүлдейтін өсімдіктер тек үйдің әрін келтіріп қана қоймайды, күзгі-қысқы уақыттарда күйзелістен де қорғайды.
Гүл – тірі интерьер
Сіздің үйіңіздің сәнді де жайлы көрінуі жиһаздарыңызбен бірге күрделі жөндеу жұмыстарына ғана байланысты емес, бөлме гүлдерін орнымен тартымды етіп қоя білу әдісінде жатыр. Гүл – бұл тірі интерьер. Тіпті, сіз үйіңізге жөндеу жұмыстарын жүргізбегеннің өзінде бөлме ішін жарқыратып, ерекше ажар беріп тұрады. Сосын бөлме гүлдері сізге көтеріңкі көңіл-күй сыйлап қана қоймайды, жүйкені тыныштандыруға да жәрдемдеседі.
Ас үйдегі гүлдер
Ас бөлмесінің температурасы қалыпты емес, ол көбінесе ысып кетеді. Сондықтан, ірі гүлдерді емес, қазтамақ (герань), шырмауық (плющ), традесканция, хлорофитум секілді орташа гүлдерді қойыңыз.
Сонымен бірге жыл бойы ас үйдің терезесі алдына аскөк, жалбыз, ақжелкен тәрізді тағамға қосылатын шөптерді отырғызуыңызға болады. Қосымша тағамға да пайдалана аласыз.
Жағымсыз иісті тартатын гүл
Ас үйдегі гүлдердің газ плитасына жақын орналаспауын, сосын терезе желдеткішінің маңында қалып кетпеуін қадағалаңыз. Егер сіз ас үйдің ауасы таза болсын десеңіз, «щучий құйрығы» атты гүлді қондырыңыз, ол жағымсыз иісті өзіне тартып алады.
Қонақ бөлмесіндегі гүлдер
Бұл бөлмеге отбасының барлық мүшелері жиналады. Үлкендер теледидар көріп отырады, балалар асыр салып ойнап жүреді, бәріне ыңғайлы. Қонақтар да осында. Сондықтан мұнда ең әдемі, көлемділеу, тіпті қымбат бағадағы гүлдер орналасады. Қонақ бөлмеңіз расында кең болса, пальма гүлдерін, лимон ағашын қойыңыз. Бұл бөлмеге жарасымды әрі классикалық стиль.
Шағындау қонақ бөлмеге шырмауық, бөлме қайыңы, аспарагус, филодендрон ыңғайлы. Бойы ұзын, сабағы жіңішке болған сайын гүлдер бөлмені ауқымды етіп көрсетеді. Қабырғаға ілініп гүлдер де бөлмені ашық, кең етіп көрсетеді.
Жатын бөлмесінде
Бұл бөлмеге өткір иісі бар гүлдерді жолатпаңыз. Ол ұйқыны қашырады. Кактус, кротон, спатифилум сияқты ірі гүлдерді де жатын бөлмеден аулақ ұстаңыз. Есесіне, гүлдейтіндерден пеларгония, примул, бегонияны отырғызған дұрыс. Олар өте нәзік, хош иісті.
Жұмыс бөлмесінде
Бамбук өкілді экзотикалық гүлдер жарасым табады. Бамбуктың энергетикасы күшті, шығармашылық шабыт бере алады. Хлорофитум гүлі де теріс энергияны тартып алып, жан-жаққа жағымды қуат тарата алатын қасиетке ие. Іскерлік қабілетім ашылсын десеңіз, осы гүлді қолданыңыз».
Мінеки, қазір бөлмелерде көп орналастырылатын бірқатар гүлдер мен өсімдіктердің табиғаты, үйді, жұмыс орнын көріктендіру тәртібі осылайша сан қилы. Және де гүлдер мен өсімдіктерді баптап күтудің де, суарудың да, түрлі аурулардан қорғаудың да өз ереже, шарасы бар. Бұл да гүл өсірем десеңіз есіңізде болсын.
