COVID-19 Aqyarda: daa 165 adam hastalandı
Aqyarda iyülniñ 29-nda 165 yañı COVID-19 hastası qayd etildi, dep bildire şeerniñ Rusiye ükümetiniñ matbuat hızmeti.
«140 adam tüzelgen soñ hastahaneden çıqarıldı. 75 yaşından 83 yaşına qadar altı kişi vefat etti. Umumen Aqyarda 20 637 insan yañı koronavirus yuqunçına oğradı. 18 000 kişi yahşı oldı, 846 insan vefat etti. 631 insan közetile – bu insanlar hastalarnen alâqada oldı, COVID-19 diagnozı tasdıqlanmadı», – dep yazıla bildirmede.
Keçken afta Rospotrebnadzor Qırımda COVID-19 hastaları vaziyeti stabilleşti, dep bildirdi. Qırımda 27 regiondan üçünde hasta sayısı eksile, Aluştada da, 12-sinde stabilleşüv bar, daa 12-nde artış devam ete. Kurort olğan Yalta, Kefe, Sudaq ve Aqyarda hasta sayısı arta.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.