Московсо ютась «Тайна адмирала Ушакова» фильмань премьерань невтемась (эрзя)
2026-це иень умарьковсто Мордовиясь ды весе православиянь масторлангось кармить тешкстамо Феодор Ушаковонь иневанькстнэнень алтазь тешкстамонь 25 иетнень. Россиянь Федерациянь Президентэсь Владимир Путин аволь весть тешкстызе апак изняво адмиралонть башка таликанзо минек государствань историясо кода Отечествань изнямонь славань кандыцянть, военной содавикс стратегонть. Культурань тевушодксонь Президентэнь фондонь грантонь ярмактнень лангс ды Мордовия Республикань Прявтонть Артём Здуновонь лезксэнзэ вельде 2025-це иестэ «АЛЛЮР-ФИЛЬМ» кинокомпаниясь «СОЛАР» компаниянть лезксэнзэ вельде апак изняво флотоводецэнть коряс снимась полнометражной художественной фильма. Лентатнень снимамось мольсь Ярославлянь ёнкссо, косо чачсь Фёдор Ушаков, ды Мордовиясо, косо сон ютавтынзе эрямонь меельце иетнень. Московонь ды весе Русень Патриархонть Кириллэнь баславамонзо коряс «Тайна адмирала Ушакова» фильмань премьерань невтемась ютавтовсь даволковонь 3-це чистэ Московсо. Эйзэнзэ тердезельть покш инжеть – Президентэнь Администрациянь, Правительствань, Московсо эрзянь-мокшонь землячествань ды масторонь эрьва кодамо регионсто эрзянь-мокшонь диаспорань представительть. «АЛЛЮР-ФИЛЬМ» кинокомпаниянь генеральной прявтось ды продюсерэсь Алла Каргина ёвтась сюкпря культурань тевушодксонь Президентэнь фондонь прявттнэнень ды Мордовиянь Прявтонтень – сынтемест фильмась бу аволь лисе. «Тайна адмирала Ушакова» художественной фильмань весе Россиянь прокатось ушодови даволковонь 5-це чистэ. Сеансос билеттнэнь рамамс истя жо мереви Пушкинэнь картанть коряс.