Мале сян по’ ямбан’ Россия яна’’ тиӈгэвна илена’’ ӈэрм’ тер’’ ненадо ю’’ пом’ мэ’’ӈа’’. Сидя ю’’ нябимдей поход няхар’’ ю’’ нябимдей по’ ёльцянд’ вадидо’ лэтрамбава’ няю’ ӈока ӈамгэм’ серта тасламби’’.
Тандая’ Чукотка’ няна ӈобт’ ма’’лёвы’’. Ямалхад таня’ Тусида Светлана Ивановна ӈэдалёрмы. Пыда яна’’ тиӈгэвна юнета илебей не. Ненэй вадава’’ тохоламбади нерня’ тидхалемби. Округханана’’ ханзер’’ вадава’’ лэтрамбавава’’ ӈани ӈэрм’ нита сякана ваде’’мэда.
Чукотка’ тер’’ Анадырь марканандо’ тасалковы’’. «Родное слово» нюбета организацияндо’ тер’’ ӈока нидо’ ӈобт’ ма’’лавы’’. Пыдо’ мале няхар’’ ю’’ по’’ ямбан’ ӈопой иӈудм’ мэць вадидо’ лэтрамба хуркари’’ серк’’ ха’’морӈа’’.
Теда’ ӈобтикы тарана серо ваде’’мы’’. Невхы иландо’ недам’ нюто’ ила’ сехэрэӈэ харвабтадо’. Ӈадьбято’ пили’’ нюртейӈэ вадамдо’ лэтраван харва’’. Тикы’ е’’эмня тодо тэнз’’ ӈэрм’ няна илена няхатато’ табекодамдо’ пюрӈа’’.
Светлана Ивановна харакута сер’ Ямал’ тиӈгэвна мюсерта нита илам’ ваде’’мы. Тикы’ хавна ненэй вадам’ тохоламба мэта табекута нямна лаханавы. Яӈга Иван Истомин ири’ лаханако ненэй вадан’ падыбавамда тензебтевы.
Ямал’ тер’’ е’’эмня хор’’ иры’ самлянзимдей яля’ тикы манзаямда, ханзер’’ паднавамда вадета. Инзелеванзь товы ненэцие няць «Мяд’ тер’’» нямна лаханакурта. Хаця нюдя ӈацекэдрев’ тохоламбаӈгуда. Тамальӈгана Саляӈгардахана мэбта’’, ӈарка библиотека’ мят’ тюида’’, адресда ти: ул. Чубынина, 36. Таняна илека серо намдаӈгуда’’.
Галина Кинчина’ падвы
С. Тусида’ тавы, dkmns89 няд ханавы
