Арат па монщат пиӆна Татьяна Ендырева олтаӆ хуват йи курна сосӆ. Йис потрат па монщат ай тэӆна ащеӆ эваӆт холантас, амэӆна па хорам ханты аратна ариса. Вуӆӆы ювмаӆ юпина ӆув ищи амэӆ па ащеӆ иты арийӆ, мала кем арат ай олмаӆ пора эваӆт номал, ар пелак ар щирӆна хансаӆ. «Ма ай тэӆна ариӆам, номсамна хыщас хоты амэм арийс, ма па вуӆӆы ювмем порайна иёлты самам арита ӆытас. Щиты олман ма ханты арат ариты «Овс мувнэ» группа хоща яңхта питсам, айӆта арат ханста». Арӆаӆ ханстаӆна, ӆув ёр мув хорас эваӆт вуӆ, самаӆна омащ похлаӆ, щиты ванна олды Ас эваӆт, щиты айна-айна хансантман итта мули ветъёң молтас ар хансмаӆ. Щи арӆаӆ щирӆна ариӆӆы па емаң хатӆатна пиӆ ныңӆаӆ пиӆна аритэӆна. Ӆув арӆаӆна нын щищкет, ӆаңки пущщи холта веритӆаты. Татьяна ниӆ нявремаӆ па хос хиӆы тайӆ, щитна ӆув арӆаӆ кутна нын ай нявремат эӆты ариты арат холта веритӆаты, мета маса арӆаӆ «Сборник фольклорных произведений народов Севера» хоща лоңман оллат. Ӆув сэңк ӆытӆ ӆув хансам арӆаӆ диск хоща ӆэщатта па йиӆап арат хансты ораңна холна энмам мувӆаӆ вантта, йиӆап ёрна ёхатты ораңна. «Самам сэңк ӆытӆ энмам мувӆамна яңхта. Маса хонды кепа веритӆам щи питта, итта щит топ ма эваӆтэм лайӆ. Самам хонды такан ки ӆытта питӆ, аӆт яңхлам». Туняӆ ӆув Ямал мув губернатор грант «Душа народов Ямала» номаниция хоща «Культурное наследие народа ханты» подноминация ясна пайтас, щит ӆув орңеӆна ант топ вуӆ майӆапсы, щи онтасна ӆув самаӆ мет арита ӆытта питӆ па мет ар ям па хорамаң арат ханста. Вера Лонгортова хансам потар