Մոսկվայում հային ու ղրղզին սպանողները «ենթադրաբար» սափրագլուխներ են
Ռուսական լրատվամիջոցների փոխանցմամբ, հնարավոր է՝ սպանությունը կատարվել է ազգային հողի վրա: Ականատեսների վկայությամբ, ուրբաթ վաղ առավոտյան ժամը 5-ի սահմաններում ինչ-որ երիտասարդներ են մոտեցել գարեջրի վաճառքի կետի մոտ իր օգնականի հետ նստած սեփականատիոջը՝ ծնունդով Հայաստանից 69-ամյա Լև Քամալյանին: Նրանց միջև լեզվակռիվ է ծագել, ինչից հետո երիտասարդներից մեկը գրապանից հանել է դանակն ու հարվածել Քամալյանի սրտին: Վերջինս տեղում մահացել է:
Հանցագործների երկրորդ զոհն է դարձել առևտրային կետի հաճախորդը՝ Ղրղզստանի քաղաքացի, 36-ամյա Նուրիկ Մունդուզովը, Նրան նույնպես սպանել են դանակի հարվածով: Հանցագործության ականատես է դարձել 29-ամյա Ալեքսանդրը, ով իջել է մոտոցիկլից, փորձելով կանխել երիտասարդների փախուստը, սակայն չի հաջողել: «Մոսկովսկի Կոմսոմոլեց»-ի փոխանցմամբ՝ ականատեսին հաջողվել է մտապահել հանցագործների դեմքերը:
Որոշ լրատվամիջոցների տվյալներով, մարդասպանները սափրագլուխներ են (սքինհեդներ), նրանց հագին զինվորական կոշիկներ են եղել: