Վնասվածքաբեր Օլիմպիադա. 4 հայ մարզիկներ դուրս են մնացել պայքարից

Սակայն Հայաստանի օլիմպիական թիմն «առաջատար» է վնասվածքների թվով: Անսպասելի ու ցավալի վնասվածքները չեն դադարում հետապնդել մեր մարզիկներին: 

 

Mediamax Sport-ը ներկայացնում է Ռիոյում պայքարը կիսատ թողած հայ օլիմպիականների մասին:

 

Անդրանիկ Կարապետյան

 

Օգոստոսի 11-ին Ռիոկենտրոնի ծանրամարտի ողջ մարզադահլիճը միահամուռ կերպով ոտքի կանգնեց ու բարձր հոգոց հանեց: Հրում վարժության երկրորդ մոտեցման ժամանակ Անդրանիկ Կարապետյանն անհաջող բարձրացրեց ծանրաձողն ու սարսափելի վնասվածք ստացավ:

 

Հաշված ժամերի ընթացքում մարզիկի մասին գրեցին աշխարհի շատ առաջատար լրատվամիջոցներ: Անգամ ղազախ մարզիկի օլիմպիական ռեկորդը ոչինչ էր դրա համեմատ: Բոլորն անհանգստացած էին ծանրորդի առողջությամբ:

 

[[gallery1]]

 

Անդրանիկին միանգամից տեղափոխեցին հիվանդանոց, պարզվեց արմունկն է դուրս ընկել: Մեկ օր անց մարզիկն արդեն Օլիմպիական ավանում էր, իր պես հանգիստ ու բարի ժպիտով:

 

Ավելի տխուր ու հուսահատված դժվար էր պատկերացնել հայկական պատվիրակությանը: Բոլորի քննարկման ու խոսակցության առարկան միայն Անդրանիկն էր: Նա այնքան մոտ էր օլիմպիական մեդալին ու անգամ մեկ մոտեցումն ամեն ինչ կորոշեր, սակայն Անդրանիկի ժամանակը դեռ կգա: 20-ամյա ծանրորդը մեկ անգամ չէ, որ ցույց է տվել իր ուժն ու ամեն ինչ հաղթահարելու կամքը:

 

Վլադիմիր Մարգարյան

 

Իզուր չէ, որ բռնցքամարտն ամենավնասվածքաբեր մարզաձեւերի թվում է: Մրցակցի հետ ցանկացած կոնտակտ կարող է ճակատագրական լինել մարզիկի համար:

 

[[gallery2]]

 

Այդպիսին էր նաեւ բռնցքամարտիկ Վլադիմիր Մարգարյանի երկրորդ ելույթն Օլիմպիական խաղերում: Բարեբախտաբար նրա առողջությանը ոչինչ չի սպառնում, սակայն սպորտային երազանքն այդպես էլ անկատար մնաց: 

 

Զգացնել տվեց դեռ առաջին մենամարտի ժամանակ ստացած հոնքի վնասվածքը: Մրցավարը դադարեցրեց մենամարտը, թեեւ անգամ այդպես Մարգարյանը պատրաստ էր շարունակել դիմակայությունը: Սակայն սպորտն էլ իր կանոններն ունի:

 

Առաքել Միրզոյան

Օլիմպիական  խաղերում ելույթն ավարտին հասցնել չհաջողվեց նաեւ ծանրորդ Առաքել Միրզոյանին:

 

[[gallery3]]

 

Մարզիկը միայն պոկում վարժության մեկ մոտեցում կարողացավ օգտագործել: Արդյունքում պարզվեց նա ոտնաթաթի վնասված է ստացել ու հրաժարվեց հետագա մասնակցությունից:

 

Իր երկրորդ Օլիմպիական խաղերում էլ (առաջինի ժամանակ 2012-ին լոնդոնյան խաղերում Միրզոյանը 0 էր ստացել) անմասն մնաց մեդալային պայքարից:

 

Մոնիկա Վասիլյան

[[gallery4]]

 

Եթե հավաքականի տղաները հենց մրցելույթի ժամանակ են ստիպված եղել դադարեցնել մասնակցությունը, ապա լողորդուհին անգամ չի էլ կարողացել Օլիմպիական խաղերում նորամուտը նշել:

 

Վասիլյանը դեռ մարզումների ժամանակ է վնասել աջ ձեռքն ու զրկվել խաղերին մասնակցելու հնարավորությունից:

 

Գոհար Նալբանդյան, Հասմիկ Բաբայան

 

Նախագծի գործընկեր