Ԓуши’’ дилмана татӈявта диԓихина деты пон каамнайна’’. Чуки ноптухуна Деты пуӈ дяԓям шаӈкмян нешаӈ тэмс’’ мэштутуӈ’’. Ненымана ӈашкиуди’’ таньдеты майпёшту’’. Пуровский’ районхана ӈайта каԓват чупей Деты пон ӈанатадят’’. Катуку’’ ӈамтаӈа, куԓкаԓи’’ хӭйман камуԓта’’ хэԓкат мемы фигурки ӈамтаӈа’’, ӈашкиуди’’ вадякот шеԓтаӈа’’.
Таԓкахана Ӈэԓм’ чеԓ’’ нешади’’ нюуди’’ маймаӈ мэт общественный’ движенихина «Ямал -потомкам!» мэна’’ нена’’ нефтегазовый’ предприятии’’ няш пон Деты пуӈ неԓьшуна ӈашкиуди’’ мячисэт — подаркит мишту’’. Чикиӈ камна ООО «НОВАТЭК-ТАРКОСАЛЕНЕФТЕГАЗ» пу’’тахана «Ямал-потомкам!» няш Таԓкахана диԓина’’ Ӈэԓм’ чеԓ’’ нешади’’ ӈашкиуди’’ праздникат шеԓташту’’.
Чуки похона ӈыдихийтуӈ шеԓ ӈашки’’ утренник минԓеш шанат тэмс нешади’’ культураӈ дет ӈайта ЦНКхана мансԓанна’’ шичитоӈ нятапиш’’. Ӈашкиуде’’ неԓьшут чики дяԓямтоӈ ӈэташтутуӈ. Диԓюнатуӈ мят майпёш кяшту’’. Ненэй паныдётуӈ шеԓаш, куԓкаԓи’’ мэкат паныдю’’ мэш утренникан тоӈаш’’. Няудетуӈ поӈкна шанат шана’кохона’’ шана’ку’’, кынуӈа’’, нятуӈ ӈучи’’ няампёш катукуӈ чемна таԓаӈа’’. Чешча вӭйсыку ни нюнта няӈ ӈашкиуди’’ шана’куԓтампёш куԓкаԓи’’ конкурсу’’ шеԓтаӈаханьш. Чуки похона утренникан шича дюԓ’’ ӈок ӈашки’’ тоӈаш’’. Мятуӈчеԓ’’ ӈука нешади’’ ню’’ камна нешанатуӈ СВОхана хайноԓта’’ ӈашкиуди’’ каптаӈаш’’. Таняӈ томы’’ хомана майдят. Шана’кош хитамахататоӈ ӈашкиуде’’ чупей детыпуӈ дет ӈайта мячисы’’ — подарки няамӈаш’’.
Маня дяханана ООО «НОВАТЭК-ТАРКОСАЛЕНЕФТЕГАЗ» нешади’’ общественное’ движение «Ямал-потомкам!» няхаԓдюкат ва’та пуӈ ӈокна мансԓаӈахаӈ. Нешади’’ дет ӈайта празднику’’ шеԓтапёш пдицахана мансԓанна’’ пон нятакошту’’. Деты пуӈ неԓьшуна Пуровский’ районхана мансԓанна’’ ТЭК дет тонԓюԓта’’ предприятии’’ выӈкна, петаԓахана диԓина’’, мансԓанна’’ Ӈэԓм’ чеԓ’’ нешади’’ ню’’ мячисэт подарки’’ тэмташту’’. Ӈашки’’ мячисэт тэмтамайтуӈ подаркитоӈ Пюԓ дяханана ӈайта общественный’ движенихина «Ямал — потомкам!» мансԓанна’’ нена’’ нямаштутуӈ. Тай’’ня чикехет выӈкна, петаԓахана диԓина’’ нешади’’ мансԓавш предприятихи’’ ӈайтапташтутуӈ.
Чуки похона шича дёнаԓкат ва’та подарки’’ ӈопшеԓы тэмтаӈаш’’. Ӈыдихийтуӈ шеԓ «Ямал — потомкам!» шаӈкмян выӈкна, петаԓахана диԓина’’ ӈашкиуди’’ Деты похона поздравийны’’. Нешади’’ диԓишат нюча каԓтыхина мэна’’, ӈашкиуди’’ мячисэт ӈупчики миты. Таԓьша ӈашки’’ дет тонԓюта подаркитоӈ ӈупчики нешанатуӈ немянатуӈ мансԓавш совхозхи’’, общинаха’’ митдятуӈ.
Утренникан томы ӈашки’’ поздравийпёш общественный’ движенихина «Ямал- потомкам!» мансԓанна’’ нена’’ маӈаш’’: шаӈкмян тэмс нешади’’ нюуди’’ ни’дя канэԓ, хома шоньшахана Деты помтоӈ мыдитуӈ. Тат неԓьняӈ чиԓниймана, хома шоньшахана нетуӈ няш диԓиӈадя!
Андрей Пяк патмы
