АР-м и ЛIышъхьэу КъумпIыл Мурат пэщэныгъэ дызэрихьэзэ Комиссием изэхэсыгъоу щыIагъэр зыфэгъэхьыгъагъэр къолъхьэ тын-Iыхыным пэшIуекIогъэнымкIэ хабзэм игъэцэкIэкIо къулыкъухэм Iофэу ашIэрэр зэхэфыгъэныр, Красногвардейскэ, Мыекъопэ ыкIи Тэхъутэмыкъое районхэм а лъэныкъомкIэ яIофхэм язытет гъэунэфыгъэныр ары.
Зэхэсыгъом хэлэжьагъэх АР-м и Къэралыгъо Совет —Хасэм и Тхьаматэу Владимир Нарожнэр, федеральнэ инспектор шъхьаIэу Сергей Дрокиныр, АР-м иминистрэхэм я Кабинет хэтхэр, хэбзэухъумэкIо ыкIи муниципальнэ къулыкъухэм япащэхэр.
АР-м и ЛIышъхьэ къолъхьэ тын-Iыхыным ыкIи нэмыкI хэбзэукъоныгъэхэм апэшIуекIогъэнымкIэ и ГъэIорышIапIэ ипащэу Алексей Селезневым къызэриIуагъэмкIэ, къолъхьэ тын-Iыхыным пэшIуекIогъэным епхыгъэ IофшIэным изэхэщэнкIэ Адыгэ Республикэм игъэцэкIэкIо къулыкъу 26-мэ яIофшIэн мы илъэсыр къызихьагъэм къыщыублагъэу зэхэщагъэ зэрэхъугъэр ауплъэкIугъ.
Хэбзэукъоныгъэхэу къыхагъэщыгъэхэм ащыщых шапхъэхэр икъоу къыдамылъытэхэу товархэр къызэращэфыхэрэр, къэралыгъо граждан къулыкъушIэхэм яхахъохэм афэгъэхьыгъэ къэбарыр икъоу зэхамыфэу къызэрэхэкIырэр, хахъохэм афэгъэхьыгъэ къэбарыр зыдатхэрэ журналхэм япхыгъэ IофтхьабзэхэмкIэ шапхъэу щыIэхэр аукъохэу къызэрэхэкIырэр ыкIи нэмыкIхэр. НепэкIэ а хэукъоныгъэхэр зэкIэ дагъэзыжьыгъэх.
Республикэм и ЛIышъхьэ ГъэIорышIапIэм пшъэрылъ фишIыгъ къолъхьэ тын-Iыхыным пэшIуекIогъэнымкIэ хэбзэгъэуцугъэу щыIэм къыдилъытэрэ шапхъэхэр, пшъэрылъэу яIэхэр къэралыгъо къулыкъушIэхэм икъоу алъагъэIэсынхэу.
«Хабзэм икъэралыгъо къулыкъушIэхэм ыкIи бюджет учреждениехэм япащэхэм пшъэдэкIыжьэу ахьырэр икъоу къагурыIоным мэхьанэшхо иIэу щыт. Ащ дакIоу кадрэхэр икъоу гъэхьазырыгъэнхэ, нахь шIогъэ ин къытэу IофшIэныр зэхэщэгъэн фае. Къолъхьэ тын-Iыхыным пэшIуекIорэ хэбзэгъэуцугъэм иположениехэм ягъэцэкIэнкIэ теурыкIуагъэ зыми къызхигъафэ хъущтэп. IофшIэным фэхъущт кIэуххэр бэкIэ зэлъытыгъэхэр министерствэхэм ыкIи ведомствэхэм, муниципалитетхэм мы Iофыгъом фыщытыкIэ тэрэз фыряIэныр ары. ХахъохэмкIэ декларациехэр зыгъэунэфын фэе къэралыгъо къулыкъушIэхэм яIэнатIэхэм икъоу анаIэ атырамыгъэт хъущтэп», — къыIуагъ КъумпIыл Мурат.
Къолъхьэ тын-Iыхыным пэшIуекIорэ IофшIэнэу муниципалитетхэм ащагъэцакIэрэм фэгъэхьыгъэу къаIотагъ Гъубжьэкъо Темур, Михаил Марьиным ыкIи Шъэо Аскэр — Красногвардейскэ, Мыекъопэ ыкIи Тэхъутэмыкое районхэм япащэхэм.
ЗэрэхагъэунэфыкIыгъэмкIэ, къолъхьэ тын-Iыхыным пэшIуекIогъэнымкIэ уплъэкIун Iофхэр зыгъэцакIэхэрэм яквалификацие зыкъегъэIэтыгъэнымкIэ муниципалитет пстэуми IофшIэн гъэнэфагъэ ащызэшIуахы. ЩыкIагъэ зыфэхъухэрэм зэрэзекIон фаехэм анаIэ тырарагъэдзэжьы, хэукъоныгъэу къыхагъэщыгъэхэри псынкIэу дагъэзыжьых.
Зэхэсыгъом икIэухым республикэм и ЛIышъхьэ пшъэрылъ афишIыгъ къэралыгъо ыкIи муниципальнэ къулыкъушIэхэу хахъохэм афэгъэхьыгъэ декларациехэр къэзытыхэрэм IэнатIэу аIыгъхэр илъэсым ыкIэм нэс икъоу агъэунэфынхэу.
