Йăнăшмалла мар. Çакă малти вырăнта тăрать. Паян, мина хăрушлăхĕн ыйтăвĕсемпе паллаштармалли кун, пирĕн пултарулăх ушкăнĕ сирпĕнекен хатĕрсемпе ĕçлекенсемпе тĕл пулса çăк ыйтăва мала кăларчĕç. Йĕркелĕх хуралçисем асăрхануллă пулни нумай çын пурнăçне çăлса хăварма пултарать.
Рикса – Бельги овчарки. Йытă çурине 2018-мĕш çулта Сарă Туран кӳрсе килнĕ, Тюменьре сирпĕнекен хатĕрсене тупма вĕреннĕ хыççăн унăн служби Чăваш Енре пуçланать. Хĕç-пăшал, снарядсем, патронсем, сирпĕнекен хатĕрсем – вĕсене тупса палăртассипе тимлет те тăватă ураллă тус. «Рикса шанчăка яланах тӳрре кăларать, вăл пĕрре те йăнăшни пулман», – тет ун пирки хуçи. Службăра тăракан йытăсенчен нумайăшĕ ĕç тунă хыççăн тутлă çимĕç ыйтаççĕ пулсан, Риксăна вара теттепе хавхалантараççĕ. Акă, машинăна сирпĕтсе яма 200 грамм тротил хунă.
Тупаять-и ăна бельги овчарки? Нумай та вăхăт иртмерĕ, йытă хӳрипе вылянтарма пуçларĕ, хăйĕн ĕçне вĕçленине палăртрĕ. Тухăçлă ĕçшĕн хуçаран кĕтнĕ тетте те лекет. Çурăлакан япала курсан йĕрке хуралçисем çакна пăхăнма сĕнеççĕ: çывăха пымалла мар, аяккалла чупмалла, ятарлă служба ĕçченĕсене чĕнмелле. Сирпĕнекен хатĕрсемпе вара ОМОН сотрудникĕсем час-час тĕл пулаççĕ. Кăçал 18 хутчен çула тухнă, хăрушлăх кăларса тăратма пултаракан хатĕрсене тишкернĕ. Планпа килĕшӳллĕн территорие тĕрĕслеççĕ, телефонпа мина хунă тесе пĕлтерсен васкаççĕ тата ытти те – иртнĕ çул 130 хутчен йĕрке хуралçисем çула тухнă. Çавăн пекех «Сувар» ОМОН инженерĕсем ятарлă çар операцинче те пулаççĕ. Нумаях пулмасть çеç вĕсем 200 килограмм çурăлакан тата 20 вăрçă хатĕрне тупса сирпĕтсе янă.