2022 çул пуçланнă чухне Чăваш Енре 16 объект чăрмавлисен шутне кĕнĕ. Паянхи куна вĕсен хисепĕ чакнă, вунна çитнĕ. Çулталăк вĕçлениччен тата тепĕр виçĕ объект ку шутран тухмалла. Кун пирки Чăваш Республикин строительство министрĕ Павел Данилов чăрмавлă объектсене çитсе курнă май пĕлтерчĕ.
Ĕçлĕ çул çӳрев «Соляной» микрорайонти 5-мĕш позицинчен пуçланчĕ. Ку объектра Чăваш Республикин строительство, архитектура тата çурт-йĕрпе коммуналлă хуçалăх министрĕ Павел Данилов кăçал пĕрремĕш хут мар. Çурт çĕкленнинче унăн тӳпи пысăк, сиксе тухнă чăрмавсене пĕтерме Павел Данилов хăй час-час хутшăнать. Халĕ объектра ĕçсем хĕрӳ пыраççĕ. Монолит ĕçĕсене вĕçленĕ, шалти ĕçсене пурнăçлаççĕ. Чӳк уйăхĕнче тăрă витме палăртаççĕ. Çурта çитес çулăн çĕртме уйăхĕнче хута ямалла. Объектра ĕçсем графикпа килĕшӳллĕн пыраççĕ. Тепĕр чăрмавлă объект Атăл хĕрринче вырнаçнă. Кунта 23 хутлă çурт çĕкленет. Халĕ ытларах шалти ĕçсем пурнăçланаççĕ.
АЛЕКСЕЙ ВАСИЛЬЕВ: «Ку объектпа пирĕн ĕçсем графикпа пыраççĕ. Ĕлкĕрсе пыратпăр, анчах проектпа кăштах проблемăсем. Согласованисем пур, паллах. Вĕсене вăхăтра майлаштараççĕ».
Объекта çитес çулта хута ямалла. Хальлĕхе çуртăн 59 проценчĕ хатĕр. Калинин урамĕнчи объекта вара кăçалах хута ямалла. Анчах кунта ĕçсем вăраха кайнă.
ВЛАДИМИР МАКСИМОВ: «Ку çуртпа ĕнтĕ пирĕн, чăнах та, отставанисем пур. Вăл ĕнтĕ малтанхи пуçламăш ĕçсем пирки пуçламаннипе çыхăннă. Тата çак çуртра демонтаж, монолит ĕçĕсем йывăр ĕçсене пула. Ĕçсем пĕртак тăсăлса кайрĕç».
Чăрмавсене, йывăрлăхсене пăхмасăр объекта кăçалах хута ямалла. Хальлĕхе кунта ĕçлекенсен шутне ӳстерме палăртрĕç. Ку ĕç хăвăртлăхне те пысăклатмалла. Сĕнӳсем мĕнле пурнăçланнине Чăваш Республикин строительство министрĕ Павел Данилов тепĕр икĕ эрнерен тепĕр хут килсе пăхĕ.
