Ырă ĕçшĕн ырă сăмах илтни хавхалантарать, ĕçлеме вăй-хал парнелет», – палăртать ыркăмăллăх юхăмĕн хастарĕ Екатерина Осокина. Çирĕп ĕç кунĕн таппинче çывăх çынсене çеç мар, йывăр лару-тăрăва çакланнă, пулăшу кĕтекен ватăсене те вăл тимлĕх уйăрма ĕлкĕрет. Çавăн пекех «Хăтлă хула таврашĕ» программăпа иртнĕ интернет уçлăхĕнчи сасăлавра та çамрăксем пысăк ĕç туса ирттернĕ. Мĕнре-ши вăрттăнлăх? Хастар волонтёрпа паллашма эпир те ĕçтешсемпе пĕрле Тăвай районне çула тухрăмăр. – Ырă ĕçсем тума пире анне-атте мĕн пĕч
<p>Ырă ĕçшĕн ырă сăмах илтни хавхалантарать, ĕçлеме вăй-хал парнелет», – палăртать ыркăмăллăх юхăмĕн хастарĕ Екатерина Осокина. Çирĕп ĕç кунĕн таппинче çывăх çынсене çеç мар, йывăр лару-тăрăва çакланнă, пулăшу кĕтекен ватăсене те вăл тимлĕх уйăрма ĕлкĕрет. Çавăн пекех «Хăтлă хула таврашĕ» программăпа иртнĕ интернет уçлăхĕнчи сасăлавра та çамрăксем пысăк ĕç туса ирттернĕ. Мĕнре-ши вăрттăнлăх? Хастар волонтёрпа паллашма эпир те ĕçтешсемпе пĕрле Тăвай районне çула тухрăмăр. – Ырă ĕçсем тума пире анне-атте мĕн пĕчĕкрен вĕрентнĕ. Эпир ялта ӳснĕ çынсем ĕçлеме хăрамастпăр. Çавăнпа та пулăшса пыма тăрăшатпăр. Ачаранах ĕçпе пиçĕхсе ӳснĕ Екатерина Осокина паян та пĕр ĕçрен те хăраса тăмасть. Çамрăкскер, яланах малалла ăнтăлма хăнăхнă. Паянхи пурнăçпа пĕр тан утма тăрăшакан çулран çул общество ĕçĕсенче те хастар хутшăнать. Ĕçне кура вара хисепĕ. Сентресем çинчи хисеп хучĕсемпе медальсем çакна çирĕплетеççĕ. ЕКАТЕРИНА ОСОКИНА: «Эпир ваттисене çеç пулăшма тăрăшмастпăр, вĕсем, малти вырăнта тăраççĕ. Вĕсене пулăшмалла, вĕсене йывăр. Тухса çӳреме, халь пылчăкра тухаймаççĕ хăшĕ-пĕрисем çул çуккипе. Çамрăксене те пулăшма тăрăшатпăр. Çавăнпа та кама май çитет пулăшма пирĕн, эпир пулăшма тăрăшатпăр. Пулăшасси пулать пуль тесе шутлатпăр». «Ырă ĕç тума çывăх çынсем хавхалантарççĕ», – тет çамрăкскер. Икĕ ача амăшĕ юратнă тĕпренчĕкĕсемшĕн те яланах ырă тĕслĕх вырăнĕнче. Пушă вăхăт пулсанах Екатерина ывăлĕсене тимлĕх уйăрать. Ашшĕ-амăшĕ хăйне мĕне вĕрентсе ӳстернĕ, хăйĕн тĕпренчĕкесене те ĕçчен те хастар, ырă кăмăллă пулма вĕрентет. РАИСА ШУРЯСЕВА: «Ачасене ĕçлеме вĕрентнĕ ĕлĕк. Мĕн ĕнте, хам фермăра ĕçленĕ май, хампа пĕрле фермăна чупнă, ĕне сума чупнă. Киле килсен килте выльăхсене пуçтарма пулăшнă, ĕне сумалла пулнă, сысни те, хур та чăххи те – пурте пулнă. Пулăшмалла, хам та пулăшатăп. Хăйсем те пулăшаççĕ. Пулăшса пыма тăрăшатпăр ĕнтĕ». «Тăван кил вăй-хал парнелекен вырăн», – тет хастар çамрăк. «Çемьепе пĕрле пĕр сĕтел тавра пухăнсан вĕри чей ĕçсе шăкăл-шăкăл калаçнине нимĕн те çитеймĕ», – теççĕ Осокинсем. Шăпах, тутлă апат-çимĕçпе сăйланнă вăхăтра ĕмĕт-тĕллеве, шухăш-кăмăла сӳтсе явать те çемье. Килте юратнă мăшăр тата ăш пиллĕ анне, ĕçре вара – Екатерина Юрьевна. ГАЛИНА СТЕПАНОВА: «Çав тери пултаруллă, маттур, илемлĕ, илрĕтӳллĕ вĕрентекен. Чăнах та, вăл тем тума та пултарать, таçта та ĕлкĕрет. Унăн икĕ ача, упăшка. Вăл питĕ пултаруллă, пурне те пулăшма тăрăшакан учительница. Эпир Екатерина Юрьевна пирĕн шкулта вĕрентнишĕн, пирĕн шкулта ĕçленишĕн питĕ савăнатпăр. Унран яланах пулăшу ыйтса тăратпăр. Вăл нихăçан та манăн вăхăт çук тесе каламас. Яланах пулăшма хатĕр». Кашни урока вĕренекенсем тулли кăмăлпа килеççĕ. Сăмах вăйĕн вăрттăнлăхĕпе çеç мар, аслисене хисеплесси, ватă çынсене пулăшасси, тăван çĕршыва юратасси – çак ыйтусене те урокра тимлĕхсĕр хăвармасть вĕрентекен. Вырăс чĕлхипе литературипе кăсăкланма вĕрентнĕсĕр пуçне шкул ачисене те ырă ĕçе явăçтарать вăл. АННА МИХАЙЛОВА: «Пирĕн учитель питĕ лайăх, аван, вăл питĕ активист. Волонтерпа хутшăнать. Эпир те ун хыççăн пыратпăр, волонтерта хутшăнатпăр. Пирĕн классра волонтерта тăракансем нумай». Хăтлăх, илем кӳртес объект тĕлĕшĕсемпе йĕркеленĕ сасăлавра пĕлтĕр çулла тăвайсем икĕ лапамшăн сасăланă. Пĕтĕмлетӳпе килĕшÿллĕн Тăрмăш ял тарăхĕнче культура кĕрменĕ умĕнчи лапама хăтлăх, илем кӳртĕç. Çанталăк ăшăтсан кĕçех ĕçсене те пикенĕ подрядчик. Кунти волонтерсем те çак ĕçре хастар пулнă». АНДРЕЙ ФЕДОРОВ: «Ватăрăх çынсене, ăнлантарма, чăнах та, йывăртарах. Вĕсем ăнланмаççĕ питех. Эпир тĕплĕн-тĕплĕн ăнлантарса, фотокарточкăсем кăтартса вĕсене ăнлантарса паратпăр та, вĕсем килĕшеççĕ, савăнаççĕ, мĕншĕн тесен çавăн пек пысăк сквер пулать, илемлĕ, капăр вырăн. Çамрăксене те, ватăрах çынсене те тухса канма хитре вырăн пулать. Çак пысăк ĕçе тунишĕн эпĕ питĕ савăнтăм, волонтерсем те питĕ савăнăçлă пулнă, мĕншĕн тесен пирĕн халь çĕнĕ сквер, илемлĕ сквер пулать». Пĕлтĕрхи пĕтĕмлетӳсем паллă. Кăçал вара волонтерсен каллех çак ĕçе ирттермелле пулĕ. Районта волонтерсен штабне йĕркеленĕ те ĕнтĕ. ВЛАДИМИР МИХАЙЛОВ: «Пĕлтĕрхи çула илсен тĕрлĕ-тĕрлĕ группăсем пулнă. Пĕр 5-6 ушкăн пирĕн яланах ĕçленĕ, вĕсем килтен киле те çӳренĕ, тĕрлĕ предприятисем тăрăх та çӳренĕ. Ятарлă планшетсемпе. Пулăшнă ĕнтĕ халăха. Госуслуги урлă сасăлав ирттермелле. Çавăнпа та каласа ăнлантарнă. Ку питĕ пысăк ĕç пуль тесе шутлатăп. Çакăн пек хăтлă лапамсем районта пулни, çак лапамсене пурнăçа кĕртиччен халăхран ыйтни питĕ лайăх япала тесе шутлатăп».</p>