Вĕрентӳ çурчĕсенче сирпĕнекен хатĕр. Çапларах хыпар çитме пуçланă паян шкулсенчен. Черетлĕ суя хыпар, чăн пулăм е такамăн ăнман шӳчĕ? Çитнĕ хыпара шута илсе йĕрке хуралçисем çула тухнă. Шупашкарти 18 пĕлӳ çуртĕнче тата муниципалитетри 2 шкултан ăс пухакансене васкавлăн пӳлĕмсенчен илсе тухнă. МАРГАРИТА МЕЛЬНИКОВА: «Тĕп хуламăрта шкулсенче сирпĕнекен хатĕрсем тупнă тесе палăртакан шăнкăравсем çите пуçланă. Вĕсенчен пĕри – 27-мĕш шкул. Кунта та çак самантра ачасене ашшĕ-амăшăсем илсе каяççĕ. Камсене ашшĕ-амăшĕ килсе илсе ĕлкĕреймен, вĕсем теннис шкулĕнче. Çак самантра вĕсем ăшăнаççĕ, ашшĕ-амăшĕсене кĕтеççĕ. Ашшĕ-амăшĕсем тата вĕрентекенсем палăртнă тăрăх, шкултан вĕсем васкавлă тухма пултарнă. Шел те, хăшĕ-пĕрисем сумкисене е тата ытти тăхăнмалли япалисене илсе ĕлкĕреймен. Çавăнпа та ăшăнма теннис шкулне кĕрсе тăнă». Вĕрентекенсем пĕлтернĕ тăрăх, ачасем шкултан тухмалли хыпара лăпкăн йышăннă, чышкăланмасăр, шикленмесĕр, аслисене итлесе шкул çуртĕнчен урамалла утнă. – Вĕрентекен ашшĕ-амăшĕн ушкăнĕнче эвакуаци иртни çинчен çырса хыпарларĕ. Васкаса 15 минут хушшинче шкула çитрĕм, ачасене киле илсе каятăп. Шăнкăравсем пулнă тесе палăртаççĕ. Интернет уçлăхĕ палăртнă тăрăх, çурçĕр-хĕвеланăç районĕнче темиçе шкулта çапларах лару-тăру тенине вуларăм. Ачасен сывлăхĕнчен хакли нимĕн те çук. Аслисем вара вĕсемшĕн яваплă. Вĕрентекенсем яваплăха туйса ачасемпе аслисем çитичченех пулчĕç. Кĕçĕнреххисене лăплантармалла та пулнă. Палăртса хăвармалла, суя хыпара пула Шупашкарти 2-мĕш лицейра та кулленхи йĕркене пăсса ачасене уроксенчен хăтарма тивнĕ. Вĕрентӳ тата çамрăксен политикин тата шалти ĕçсен министерствинче пĕлтернĕ тăрах, суя хыпар саракансене тупса палăртĕç, явап тыттарĕç. ДМИТИРИЙ ЗАХАРОВ: «Çак самантра Раççей Федерацийĕн наци гвардийĕн Чăваш Енри управленийĕн ĕçченĕсем, йĕрке хуралçисем кашни вĕрентӳ çуртĕнче ятарлă ĕçемпе тĕрĕслевсем ирттернĕ. Сирпĕнекен хатĕрсем тупман. Ачасем маллала вĕренӳ ĕçне малалла тăсма пултараççĕ». Шел те, юлашки вăхăтра Раççейре шкулсем тата вĕрентӳ çурчĕсем çине тапăннă тĕслĕхсем йышланнă. Çакна май, шкулсенче ачасемпе хăйсене çак ларура мĕнле тытмаллине час-часах сӳтсе яваççĕ палăртаççĕ вĕрентекенсем. Маргарита Мельникова, Игорь Зверев
