Çĕнĕ технологисем вăй илнĕ тапхăрта шкул ӳсĕмĕнчи ачасем çеç мар, аслă ăрури çынсем те çĕнĕ пĕлӳ пухас тĕллевлĕ. Çавăн пекех алла тин çеç дипломлă пулнă çамрăксем те куллен хăйсен ăсталăхне туптама ăнтăлаççĕ. Кун валли республикăра майсем çителĕклĕ. Вĕсем хушăнсах пыраççĕ. Çĕнĕ Шупашкарти химипе механика техникумĕ çумĕнче ăста та паха специалитсем хатĕрлемелли центр уçăлчĕ. Тин çеç уçăлнă центра республика Пуçлăхĕ Олег Николаев та пахалама ĕлкĕрчĕ. Кирек епле тытăмра та хăйсен ĕçне тивĕçлĕ пурнăçлакан, тарăн пĕлÿллĕ специалитсем кирлĕ пулнине палăртрĕ вăл. Шăпах та, центр малашне кирлĕ пĕлӳ пухма, квалификацие ӳстерме, е пач урăх профессие алла илме май парĕ. – Çак центр пирĕн пĕтĕм вĕрентÿ заведенийĕсене, тĕрлĕ предприятисене, влаç органĕсене пĕрле ĕçлесе пырса тĕрлĕ енлĕ профессисене, çынсене хăвăрт хатĕрлеме май паракан центр, мĕншĕн тесессĕн çакăнта ĕç паракан предприятисем хăйсен потребносчĕсене калама пултараççĕ. Центра «Вĕрентӳ» наци проекчĕ пулăшнипе хута яма май килнĕ. Федераци хыснинчен 20 миллиона яхăн укçа-тенкĕ уйăрнă. 2024-мĕш çул тĕлне Канаш хулинче те çакăн йышши центр уçăлĕ. Çĕнĕ Шупашкарти центрпа аслă пĕлӳ паракан вĕрентӳ çурчĕсем тачă çыхăнса ĕçлеме хатĕр те. ВЛАДИМИР ИВАНОВ: «Пуриншĕн те усăллă. Чи малтанах вĕренекенсемшĕн усăллă. Вĕсем профессие алла илес умĕн суйласа илме пулăшать. Профессине суйласа илнĕ хыççăн, çак профессире аталанма майсем туса парать. Çав шутра пулас ĕç вырăнне тупма пулать. Пулас ĕç вырăнне кăна мар, кампа пĕрле ĕçлессине те суйласа илме май парать». Паян центрăн электрон уçлăхĕнче 3 тытăм ĕçлет. Кунта ĕçпе тивĕçтерекенсем те, алла çĕнĕ профессие е пултарулăха туптас текенсем те хыпарпа тĕплĕн паллашма пултараççĕ. Маргарита Мельникова, Юрий Марков
