Æвзонг техникты станцы директор Къалаты Нариман нын куыд радзырдта, афтæмæй карантины нормæтæ ист æрцыдысты станцы æмæ ныр уыдон æнхъæлмæ кæсынц ахуыргæнинæгтæм. Ныртæккæ уавæр куы фæхуыздæр, карантин ист куы æрцыд, уæд та коллектив цæттæ у ахуыргæнинæгтимæ кусынмæ. Алы ног ахуыры аз дæр æвзонг техникты станцмæ æрбацæуы 150 скъоладзауы бæрц, уыдон фылдæр вæййынц лæппу ахуыргæнинæгтæ. Лæппуты иууыл тынгдæр цымыдис кæны роботехникæ æмæ 3D моделтæ аразыны кружоктæ. Чызджытæ та фыл-дæр цымыдис кæнынц арæхстджын къухты кружокмæ. Æцæг, хъæдæрмæгыл нывæфтыдтæ кæй цымыдис кæны, ахæм чызджытæ дæр ис. Уæддæр къордтæ иууыл тынгдæр цæ-уынц роботехникæйы уроктæм. Нырма дыууæ азы размæ байгом, фæлæ уымæ тынгдæр цымыдис кæнынц, æвзонг техникты станцмæ чи æрбацæуы, уыцы ахуыргæнинæгтæ. Уымæн æмæ кружокты ис роботтæ, ис сын сæрмагонд конструктор æмæ йæ хъуамæ сæмбырд кæной. Фыст ыл цæуы компьютерон программæ æмæ афтæмæй робот кусы удæгас принципмæ гæсгæ. Хъæдæрмæджы æмæ арæхстджын къухты кружокмæ дæр бирæ сывæллæттæ цымыдис кæнынц. Цы дзаумæттæ саразынц, уыдон æлхæнынмæ æрбацæуынц не ‘мбæстæгтæ. Сæ иууыл хуыздæртæ та æфснайд æрцæуынц Æрыгон техникты станцы музейы. Раздæр Æвзонг техникты станцы уыд радиокружок дæр. Фæлæ фæстаг азты йæ куыст банымæг. Иуæй дзы ифтонгадтæ кæй нæ уыд, уый аххосæй. Аннæмæй та кружокæн нæ уыд специалист. Ныр станцы фæзынд ахæм ахуыргæнæг. Нæ республикæ цифрæйон телеуынынадмæ куы ахызт, уæд ацы кружокы ахадындзинад дæр фæактуалон ис. Фæзынд ахуыргæнæг æмæ кружок дæр ифтонг æрцыд æнæмæнгхъæуæг техникæйæ. Ахуырад æмæ зонады министрад хорз сæ хъус дарынц станцы кусджытæм, рæстæгæй-рæстæгмæ сæ баххæст кæнынц нырыккон ифтонггæрз-тæй. Æвзонг техникты станцы директор Къалаты Нариман куыд зæгъы, афтæмæй Президент Бибылты Анатолийы фæрцы уыдон 2020 азы балхæдтой нырыккон тæрх, кæцы тынг зæрдиагæй хъуыд сæ куыстуаты. Ацы тæрх зынаргъ уыд, сæхи фæрæзтæ дæр дзы уыд, фæлæ уыдон фаг нæ уыдысты. Ифтонгад цæмæн хъæуы æмæ цы функцитæ æххæст кæндзæнис, уый куы базыдта Президент, уæд йæ сæрмагонд фондæй рахицæн кодта, цы æхцайы фæрæзтæ ма нæ фаг кодтой, уыдон. Ацы ифтонгад иттæг ахъаз фæцис, станцы цы ахуыргæнджытæ кусы, уыдонæн. Ныр уый фæрцы цалдæр кружочы ахуыргæнджытæн сæ бон нывæндын нæ уроктæ, цæстуынгæ æрмæджытæ æв-дисгæйæ, ахуыргæнинæгтæ хуыздæр æмбарынц урочы цыд æмæ мидис. Æвзонг техникты хъомылгæнинæгтæ арæх вæййынц Цæгат Ирыстон-Аланийы техникон центр «Квонтори»-йы. Уым цы конкурстæ вæййы, уым фылдæр хатт бацахсынц при-зон бынæттæ. Цæгаттаг коллегæтæ хорз райсынц нæ сабиты, ауадзынц сын мастер-къластæ. Æвзонг техникты станц интенсивон куыст кæны, районты сын цы станцы къордтæ ис, уыдонимæ. Зæгъæм, филиалтæ сын ис Дзауы скъолайы, Цхинвалы скъола-интернаты æмæ ма №10-æм скъолайы дæр. Уым дæр кружоктæ ифтонг сты хъæуæг æрмæ-джытæй. Иууыл хуыздæр иф-тонг та — Ленингоры сывæллæтты хæдзары цы куырдадзы ис, уый. Сабиты куыстыты бæрæг кæнынмæ ацæуынц профилон кружокты ахуыргæнджытæ. Цæмæй æрыгон стан-цы ахуыргæнинæгтæ æмбæлой æмæ кæрæдзи зоной, уый тыххæй сæ арæх æрбаласынц станцы цы равдыстытæ вæййы, уырдæм. Уыцы хъуыддаджы сын стыр ахъаз у, Хицауад цы машинæ балхæдта, уый . УАЗÆГТЫ Марфа
