Чăваш Ен Пуçлăхĕ Олег Николаев пресс-конференци ирттерчĕ
Чăваш Енри массăллă информаци хатĕрĕсенче тăрăшакансем паян республика ертӳçипе Олег Николаевпа тĕл пулчĕç. «Шупашкар-Арена» пăр керменĕнче иртнĕ пресс-конференци икĕ сехет те 20 минута тăсăлчĕ. Журналистсем 36 ыйту пачĕç. Республикăри, районсемпе хуласенчи тата Раççей шайĕнчи массăлла информаци хатĕрĕсенче ĕçлекенсем экономикăри лару-тăрупа, халăхăн шалу укçи виçипе, социаллă пурнăçри ытти ыйтупа кăсăкланчĕç. Тĕплĕнрех Елизавета Цветкова каласа парать. Çĕршывра ятарлă çар операцине хутшăнакансен çемйисене пулăшма Патшалăх фончĕ туса хурасшăн. Чăваш Енре те çак фонд ĕçлесе каймалла. Регион Пуçлăхĕ вăл мĕн пур юхăма пĕрлештерекен тытăм пулассине каларĕ. Фонд юридици ыйтăвĕсене татса парсанах ĕçлесе кайĕ. Шупашкарти «Садовый» микрорайонти шкула хăçан хăпартса пĕтерссипе те кăсăкланчĕç журналистсем. «Пĕлӳ çурчĕ çĕнĕ вĕренӳ çулĕ тĕлне ачасене йышăнма хатĕр пулĕ», – терĕ Олег Алексеевич. Çурт-йĕрпе коммуналлă хуçалăх тытăмĕнче юсав ĕçĕсем пурнăçласси пĕлтерĕшлĕ. Сăмахран, нумай хваттерлĕ çуртсенче 1800 лифт улăштармалла. Районсенче шыв башнисем çĕнелмелле. Тасатакан сооруженисене улăштармалла. 2023-мĕш çулта Шупашкара 21 троллейбус килмелле. Кăçал тата çитес çул пĕтĕмпе 150 троллейбус туянма палăртнă. Техникăна çапла çĕнетсе пырĕç. Пур ача та телейлĕ те çирĕп çемьере ӳстĕр. Ачасене усрава илнĕ çемьесене çăмăллăхсемпе тивĕçтерессипе те тимлĕхре. ОЛЬГА АРТЕМЬЕВА: «2023-мĕш çул телейлĕ ачалăх çулталăкĕ пулнă май çакнашкал çемьесене усрава илнĕ ачаллă çемьесене Чăваш Ен Правительстви енчен хушма пулăшусем пулаççĕ-ши?» Ачасене усрава илнĕ çемьесене куçран вĕçертмĕç. Кăçал 6 тата ытларах ачаллă çемьесене çурт-йĕрпе тивĕçтерме тĕллев лартнă. Сывлăх сыхлав тытăмĕнче ĕçлекенсен шалăвĕ те тимлĕхре. Бюджет тытăмĕнче вăй хуракансен ĕç укçи саккунпа килĕшӳллĕн пысăкланать. Унсăр пуçне специалистсене тĕрлĕ программăсемпе çăмăллăх параççĕ. Калăпăр, «Земство тухтăрĕ» программăпа çамрăк специалистсене уйрăммăн пулăшаççĕ. Республика туризма аталантарассипе те пысăк ĕçсем тума палартнă. Агротуризм вăй илнине палăртмалла. «Комплекслă ĕçлени инвестици вырăнĕсене уçма май парать», – палăртрĕ Чăваш Ен Пуçлăхĕ. Пресс-конференцире журналистсем Атăл леш енне аталантарассипе мĕнле ĕçсем тума палăртнипе, çул-йĕр строительстви, инвестици илĕртӳлĕхĕ пирки те кăсăкланчĕç. Пур ыйту çине те хурав тупрĕç. Республика ертӳçи Олег Николаев: «Уçă калаçу чылай ыйтăва вăхăтра татса пама май парать», – терĕ. – Эпĕ хам енчен пĕр май телевидени, радио тата тĕрлĕ енлĕ социаллă сетьсенче тĕрлĕ ыйтусемпе калаçатăп пулсассăн та, ман шутпа, çакăн пек çулталăкра пĕрре пĕтĕм Чăваш Республикинче тата ытти регионсенчен пирĕн ĕçсемпе интересленкен журналистсем калаçни питĕ усăллă япала пек туйăнать. Тепĕр енчен çакăн пек ыйтусем хыççăн, ман шутпа, журналистсем тĕрлĕ ыйтусене татах та тарăнрах ăнланса хăйсен вулаканĕсем валли вĕсене кирлĕ пек каласа пама пултараççĕ.