Москвада коронавирус билан боғлиқ чекловлар 31 майгача узайтирилди
Айни пайтда ишлаб чиқариш ва қурилиш ширкатларининг иш бошлашига рухсат берилади. Хизмат кўрсатиш соҳасида фаолият юритувчи корхоналар эса ҳали очилмайди.
Мактаблар ҳам ёпиқлигича қолади. Битирувчи бўлмаган синфлар ўқувчиларига баҳолар 15 майгача қўйиб бўлинади. Бу орада масофавий таълим 31 майгача давом этади, аммо ўқувчиларга баҳо қўйилмайди ва уй вазифаси берилмайди. 9 ва 11-синф битирувчилари масофавий таълимни давом эттирадилар. Уларнинг имтиҳонлари муддати ва формати ҳақида қўшимча маълумот берилади.
Аввал расмийлаштирилган иш рухсатномалари автоматик равишда 31 майгача узайтирилади, дейилади Собяниннинг баёнотида.
Москва мэри жамоат жойлари ва транспортда ниқоб ва қўлқоп тақиб юриш 12 майгача мажбурий бўлишини ҳам маълум қилган. "Россия-24" телеканалига берган суҳбатида Собянин коронавирус инфекциясига чалиниш даражаси расмий рақамлардан анча баланд эканини билдирган. Унга кўра, аслида шаҳарда COVID-19 вирусига чалинганлар сони, расмий статистикада акс этганидек, 92 нафар эмас, 300 минг нафардан ошади.
Аввалроқ Россия президенти Владимир Путин мамлакатда ишланмайдиган кунлар тартиби битадиган 11 майдан кейин раҳбарлар ўз ҳудудларида карантин чораларини юмшатиб-юмшатмаслик ҳақида қарор беришлари кераклигини қайд этган.