HUAWEI son 10 ildə tədqiqat və inkişaflara 173 milyard dollar xərcləyib
HUAWEI şirkəti son on ildə tədqiqat və inkişaf (R&D) sahəsinə ümumilikdə 173 milyard dollar sərmayə qoyub. Bu barədə şirkətin istehlak məhsulları bölməsinin rəhbəri Riçard Yu, Pura 80 smartfon seriyasının təqdimatı zamanı məlumat verib.
Onun sözlərinə görə, yalnız 2023-cü ildə R&D sahəsinə 25 milyard dollar ayrılıb ki, bu da HUAWEI-nin illik gəlirinin 20,8%-ni təşkil edir. Bu investisiyalar nəticəsində şirkət son illərdə bir sıra innovativ məhsullar təqdim edib və bunlar Amerika texnologiyaları ilə rəqabət apara biləcək səviyyədədir.
Hazırda HUAWEI-nin 150 000-dən çox patent qeydiyyatı var. Bu patentlər ağıllı saatlar və geyilə bilən cihazlar, smartfon sensorları, ağıllı avtomobil texnologiyaları, həmçinin 5G standartını dəstəkləyən cihazlar, optik hesablama çipləri və böyük məlumat mərkəzləri üçün yüksək sürətli interfeyslər kimi sahələri əhatə edir.
Şirkət bildirib ki, investisiyaların artması bəzən xalis mənfəətin azalmasına səbəb olsa da, nəticədə daha müasir və keyfiyyətli məhsullar hazırlanır və istifadəçilərin ixtiyarına verilir.
The post HUAWEI son 10 ildə tədqiqat və inkişaflara 173 milyard dollar xərcləyib appeared first on InfoCity.