Marshall özünün Heston 120 adlı ilk soundbar-ını təqdim etdi
Marshall ev audio bazarına gurultulu bir giriş edib. Şirkətin yeni məhsulu olan soundbar Heston 120 ilk baxışlardan belə çoxlarını təəccübləndirib — onu artıq Sonos Arc Ultra ilə müqayisə edirlər.
Soundbar – böyük səs keyfiyyəti təmin edən bir səs sistemidir. Televizorunuzun daxili səsləndirici sistemi məhdud ola bilər və buna görə də filmlərdəki incə səslər və detallari qaçirmaq mümkün ola bilər. Soundbar televizorunuzun səs gücünü artirmaq və daha keyfiyyətli səs təcrübəsi yaratmaq üçün ideal bir həlldir.
Süni dəridən hazırlanmış, qara rəngli və qızılı idarəetmə elementləri ilə bəzədilmiş incə korpusun içində 5.2.1 sistemli, ümumilikdə 150 Vt gücə malik 11 dinamik yerləşir. Cihazı idarə etmək üçün isə yenilənmiş Marshall tətbiqi təqdim olunur.
Tətbiqdə dörd səs rejimindən birini seçmək mümkündür: “Musiqi”, “Kino”, “Səs” və “Gecə”. Əgər səs parametrlərini özünüz tənzimləmək istəyirsinizsə, bu iş üçün aşağı və yuxarı tezlikləri, eləcə də mənbəni dəyişmək imkanı verən idarəetmə düymələri mövcuddur.
Qoşulma imkanları da olduqca genişdir: HDMI eARC və Pass-Through, USB-C, RCA (tülpan) girişləri və 100 Mbit/s sürətli Ethernet. Cihaz həmçinin Wi-Fi 6 və Bluetooth 5.3 texnologiyaları ilə təchiz olunub. Dolby Atmos və DTS:X dəstəyi də var.
Bu modeli artıq $1000 qiymətinə öncədən sifariş edə bilərsiniz. Rəsmi satışlar isə 3 iyun tarixində başlayacaq.
The post Marshall özünün Heston 120 adlı ilk soundbar-ını təqdim etdi appeared first on InfoCity.